Ieu kaca geus divalidasi
- pira ukur awewe, tangtuna ge moal gagal, dianggap geus biasa, pok ngomong jeung umat-imut, meruhkeun hate nu bedang.
- Alah kutan anu geulis, ka pun Engkang wantun bedang, wani nampik ngagogoreng, jeung wantun ngusir sagala, ka pantaran pun Kakang, naha teu sieun kaduhung, mun ku Kakang ditandasa.
- Bari ngomong muril kumis, ka hareup ised ngalengkah, lahak-lehek jeung gumasep, ngadeukeutan lalaunan, arek nyekel panangan, Enden Sari anu lucu, teger teu seepeun akal.
- Ku nu geulis geus kajudi, Ronggonoto bade jahat, bari mundur bet kareret, sisi amben tempat ludah, anu tina kuningan, kajurung ku manah bendu, kerewek bae dicandak.
- Dibaledogkeun sakali, ku napsu nu hayang puas, kana sirah Ronggonoto, mani ngagelentrang pisan, ninggang kana cepilna, Ronggonoto teh ngudupung, mokaha bae nyerina.
- Burah-bareh bijil getih, anggoan pinuh ku luah, Ronggonoto gera-gero, pok nyalukan ka rencangna, nu masih di laluar, anu ngaraponan sepuh, Juragan Patih Aria.
- Barang nguping nu ngajerit, nya eta dununganana, nu keur nyuuh kana amben, nahan kanyeri kaera, wirang kabina-bina, geus kitu gancang diburu, ditulungan ku rencangna.
- Bari mamawa gegendir, rek ngabelaan dunungan, Mardawa bijil ti jero, haruhah-harehoh lumpat, muru nu jejeritan, sanggeus Ki Mardawa cunduk, nu lucu ageung manahna.
Sinom
- Anu keur ditarulungan, ku Nden Sari teu ditolih, enggal lebet jeung putrana, Ki Mardawa anu ngiring, meundeutkeun panto gasik, ditulakan rekep nutup, teras haharewosan, Mang Mardawa ati-ati, nahan panto bisi diteumbrag ti luar.
- Ayeuna ulah leleda, urang buru-buru indit, sabab Ronggo jeung baturna, ingetan mo salah deui, di dieu moal cicing, murugul maraksa asup, urang jalan ka tukang, norobos ka lawang kori, kudu gancang bisi diudag ririwa.
- Ki Mardawa ngawalonan, sanggemna sumangga ngiring, urang enggal bae jengkar, nyandak panganggo keur salin,82
