Ieu kaca geus diuji baca
- Paribasa seuneu hurung cai caah, urang kudu tarebih, ngadadak sakala, bet aya huru-hara, geus rusuh di jero masjid, karaman tandang, brag-breg pating jarerit.
- Nu ti jero ting durugdug lalumpatan, pagelek-gelek bijil, der parebut lawang, jandela panto dordar, barbirber batu pabuis, pemberontakan, nu keuna tingjarerit.
- Halipah ge hantem pada maledogan, meh teu iasa usik, sabab kapiuhan, ngajungkel ngagoledag, mastakana ninggang ubin, matak karunya, diburu ku Muslimin.
- Babarengan mapayang Halipah Usman, jung dicandak marulih, lebet ka bumina, kaleresan teu anggang, ngarendeng sinareng masjid, di pangkuleman, dijagi ku prajurit.
- Pitulungna ti Allah azza wajalla, teu kungsi lami deui, Halipah geus damang, henteu sakara-kara ngersakeun ngimanan deui, cara biasa, netepan sabi hari.
- Karaman teh beuki goreng talajakna, bedegong leuwih wani, taya kahormatan, adigung adiguna, Halipah dikepung deui, teu bisa lugay, dikurung jadi hiji.
- Umat Islam nu satia ka Halipah, pangpangna urang Yasrib, Muslimin Madinah, beurang peuting jaraga, diaplus terus digilir, Halipah Usman, di bumi tetep linggih.
- Ali - Jubir jeung Talhah ngintun putrana, supaya ngiring jagi, ngajaga Halipah, jeung batur babarengan, barudak patinggaridig, tandang jaraga, tumbak palancip-lancip.
- Jaragana sakuriling pakarangan, saban lawang dijagi, tempat pangawalan, dina hiji adegan, di unggal lawang sahiji, pantes merenah, beurang peuting sayagi.
- Surat dines ku utusan geus dibawa, hubungan itikurih, ka Basrah Siria, rek menta bantuan, gasik dikirim prajurit, tentara Islam, pangawal nu tarapis.
