Ieu kaca geus diuji baca
- Reaksi di Mesir timbul, golongan kaom Muslimin, nu saratia ka Usman, unggal usik tinggaridig, ngasruk neangan karaman, pambarontak nu barengis.
- Dimana lamun geus tepung, jeung karaman geus panggih, dibelaan kuah darah, henteu dileupaskeun deui, dipasrahkeun ka nagara, supaya dihukum picis.
- Gubernur Yaman geus kabur, geus lolos ngantunkeun negeri, tur mawa kas baetalmal, jumlahna henteu saeutik, ceuk beja lumpat ka Mekah, ku nagara diilari.
- Ka Yaman terus dikintun, Gubernur jelema ngarti, radikal gagah pertentang, pasagi geus meunang nguji, cocog pisan keur di Yaman, propinsi nu paling kritis.
- Ka Siria geus dikintun, Gubernur enggal dikirim, nasibna matak karunya, nu heubeul teu daek indit, ngumando alat nagara, keur ngepung nu nembe sumping.
- Gubernur enggal teh kabur, dioyok jeung dibeberik, teu beda Jeung ngepung bangsat, beurang peuting terus ngacir, talanjang ngan kaos Sangsang, saroweh balas tikait.
- Jauh ge mo burung cunduk, tebih ge mo burung dugi, ka Madinah kocap datang, laporan ka nu berwajib, Halipah reumbay Cisoca, sedih ningal nu belejid.
- Ka upah oge dikepung, Gubernur anu pinilih pertentang ahli nagara, hiji opsir Akademi, guru besar ti Tentara, pamili Halipah Ali.
- Teu sangka sagede gunung, nasibna teh leuwih sedih, leuwih wirang ti Siria, ditangkep bade di peuncit, dianggap penjahat perang, untungna geus leupas deui.
- Geus kitu kersa nu Agung, sajero aya di buwi, atawa di pangberokan, geus aya nu bela pati, nu nulungan ka anjeunna, ti peuting disina bijil.
134
