Ieu kaca geus diuji baca
- Lamun kitu Amiril Muminin, euweuh rido Allah, henteu patut rek kudu didénge, malah timbul panasaran ati, nagara bajewid, kadang kala ancur.
- Rayat umum komo dipeupeurih, atawa digosok, ti golongan Gubernur nu gede, nu kamashur golongan politik, teu malikir deui, napsuna ger hurung.
- Ningal bukti jubah pinuh getih, sareng bukti ramo, jeung karaman nu diantep keneh, pangojokna Muawiah tadi, ku rayat kaharti, yen Ali teu jujur.
- Mun kitu mah Amiri Muminin, tetela teu lesot, tina milu milampah nu goreng, kamungkinan jeung karaman jangji, badis sidik bukti, geus ngantep nu burung.
- Naon atuh nu jadi hawatir, ngajadikeun kagok, pangna aneh dicicingkeun bae, henteu tandang nitah juru telik, ka daerah indit, nangkepan nu burung.
- Mun geus beunang nu goblog darengki, Kagol, dipariksa sing kapanggih kabeh, tur ditungtut nu adil, jeung teu kudu inggis, Hakim nu ngahukum.
- Na ieu mah Amiril Muminin, bet jiga nu kagok, buktina teh bet hese beleke, bisa jadi mun anjeunna ngiring, sapongkol ngahiji, ngomplot milu burung.
- Tah sakitu kaayaan Damsik, panasna katembong, rahayat teh tingaraleut bae, mundar-mandir teu daraek cicing, meh sabiwir hiji, yen Ali samiuk,
- Tah dasarna Gubernur nu sumping, ku rayat di oyok, dianggapna kasalahan gede, margi Ali ngantep ka nu batil, tetela teu adil, sarta milu burung.
- Kaduana surat nu dikirim, geus dianggap momok, Muawiah siasatna hade, eta surat dijadikeun bukti, pikeun agitasi, rayat sina ngamuk.
138
