Ieu kaca geus diuji baca
- Paling apal kana hadis, nu asal ti Rasulullah, dugi ka sarebu langkung, jeung dua ratus panambih, sareng sapuluh ahirna, ku anjeunna geus katalar.
- Hanjakalna mung saeutik, rupina kawantu anom, sok enggal keuna pangaruh, teu kaop selenting angin, mun beja gampang ditampa, ahirna matak bahaya.
- Kangjeng Nabi keur lastari, anjeunna teh masih anom, meh salapan welas taun, komo deui pikeun istri, sentimenna sok mokaha, babari henteu puasan.
- Anjeunna teu kersa lali, kajadian hiji waktos, waktu Ali kungsi usul, nyerankeun ka Kangjeng Nabi, Aisah enggal dipirak, ceuk beja bongan geus jinah.
- Ieu nu jadi nyungkelit, jigana dugi ka maot, anjeunna sumeja nungtut, males ka Halipah Ali, bahanna pikeun ngalawan, perkara Halipah Usman.
- Teu kenging dibeuli-beuli, dicombo ku Rasulullah, diterangkeun dina wahyu, yen anjeunna suci murni, Aisah tetep ngabantah, ka Ali teu kersa robah.
- Saurna teh matak isin, sanajan suci ceuk Allah, ti harita terus bendu, henteu lali mika-ijid, aya jalan komo meuntas, najan kudu huru-hara.
- Tah ieu nu jadi margi, di Mekah keur aya wartos, Halipah Usman geus pupus, tur Ali nu jadi ganti, anjeunna timbul amarah, teu ngangken Aji Halipah.
- Anjeunan teh mika-ijid, nganggapna kabeh garelo, Usman teu kudu dibunuh, ka Ali nya kitu deui, leleda teu gancang tandang, ngahukuman kanu salah.
- Pamadegan Sayid Ali, nu sipatna ukur ngantos, henteu buru-buru nungtut, dianggapna keji kecing, lemah taya pangawasa, teu bisa jadi Halipah.
147
