Ieu kaca geus diuji baca
- Kota Basrah dikurung nepi ka beurang, diatur rekep rapih, jalan nu ti heula, sakabeh parapatan, geus dipager ku prajurit, kaom karaman, kesit pating garidig.
- Kitu deui nasibna alat nagara, dipilih nu parenting, dianggap bahaya, beresih ditangkepan, digiring ngaleut ka tangsi, dipangberokan, nepi ka heurin usik.
- Kota Basrah diereh ku Abu Talhah, duaan sareng Jubir, anu kumawasa, ngatur pamarentahan, najan ukur sapropinsi, modal berjoang, dianggap leuwih penting.
- Sanggeus kitu prak ngayakeun panungtutan, pamariksaan bengis, nu jadi komplotan, anu nelasan Usman, hukum darurat nu keji, sawenang-wenang, rahayat ting jarerit.
- Nu disiksa geus genep ratus jelema, ditungtut hukum pati, taya nu ngabela, sumawonna ngalawan, nu warani naek banding, mundur perkara, hukuman repolusi.
- Gubernur mah bubuhan aya jasana, dihukum rada adil, henteu ditelasan, hampang ukur disiksa, masih keneh bisa mulih, sanajan hina, sanajan nyeri peurih.
- Gubernur teh disiksana digundulan, janggot kumis dikerik, nya kitu halisna, tambah ditalanjangan, dibanda meh beurang peuting, diusir pisan, henteu mangrupi jalmi.
- Dituluykeun diiring diarak-arak, dideugdeug kabeh jalmi, ngurilingan kota, geus anggang sina lumpat, kudu nurut lumpat ngacir, Saparan-paran, salirana belejid.
- Kaleresan asup ka lembur nu aman, pitulung Maha Suci, aya nu narima, tur gancang disalinan, kocapkeun geus ginding deui, taya halisan, ruramba kumis leungit.
- Beurang peuting anjeunna teu liren lumpat, jeung rawah-riwih nangis, kocapkeun geus datang, ka markas perkemahan, asrama Halipah Ali, di kota Nejaj, Halipah ngiring sedih.
160
