Ieu kaca geus diuji baca
- Keur aing mah henteu jadi rugi, sabalikna atoh, sabab musuh nu dianggap gede, pangdeukeutna ti nagara Mesir, nya Gubernur Kois, tetela geus kabur.
- Nu sejenna araya di Mesir, teu matak hawatos, dianggapna rayat leutik bae, nu yakin mah kumaha ceuk aing, teu dianggap penting, pasti kana nurut.
- Kakuatan Muawiah nambih, tanagana tembong, nu dianggap musuhna galede, nu bijilna ti nagara Mesir, kiwari geus indit, dipandangna mulus.
- Kaduana anu paling penting, ayeuna geus katon, kauntungan Muawiah keneh, panindesan ti Halipah Ali, ka Talhah Jeung Jubir, Aisah ge kitu.
- Ku ayana dordar perang tanding, dugi ka maraot, nu korbanna rada sede, oge geus sapuluh rebu jalmi leuwih, saha anu rugi, tur saha nu untung.
- Pihak Talhalh Aisah jeung Jubir, mugi teu paroho, sami bae rencang Ali keneh, misah soten kumargi politik, Ali yakin rugi, Muawiah untung.
- Talhah Jubir lamun can lastari, lawan nu arabot, keur Ali mah bantuan nu gede, Muawiah moal bisa hasil, mo bisa kapilih, tangtu kudu mundur.
- Ku kituna Muawiah seuri, nganggapna geus kosong, ku lantaran musuhna nu gede, sadayana parantos lastari, nu kantun mung Ali, teu jadi kapaur.
- Kauntungan keur taktik politik, tetela geus katon, Muawiah ngeunah deui bae, margi Ali geus jadi ngahiji, jeung karaman bengis, Komplotan parusuh.
- Ieu bahan nya kaasup penting, keur modal ngabohong, sangkan umat ngarewaeun kabeh, ka Halipah sangkan mikaijid, Jauh teu ngahiji, kitu ceuk nu burung.
186
