Ieu kaca geus diuji baca
- Harita mah maranehna jiga nurut, di tukangeun ting jarebi, sabalikna geus diatur, nunggu kaayaan Sipin, ahirna baris digenjot.
- Muawiah sanggeus rundingan di Adruh, di Siria raos calik, malah anjeunna teh ngatur, gerakan nu teu kaciri, Muhammad rek disorobot.
- Dalangna mah di Mesir sanajan jauh, tetep bae geuning hiji, Muawiah nu geus ngatur, surat merul saban wanci, ditampa ku nu garelo.
- Sabotase di Mesir mah saban waktu, subpersip lamun kiwari, rahayat geus tinggurutu, misengit Halipah Ali, Muawiah mah ngaheot.
- Perlengkapan gagaman perang dikintun, sandang pangan reujeung duit, ka Mesir kocap geus cunduk, markas gelap anu nampi, Muhammad mah tetep bongoh.
- Henteu sangka alat nagara marilu, samiuk teu mikir deui, ka Gubernur malik musuh, ka Halipah Ali sami, pangaruh duit morongos.
- Ku gubernur lami-lami geus kabitur, ditangkepan hiji-hiji, sawatara waktu tunduk, geus lami marudah deui, anehna taya kakapok.
- Beuki lila karasana beuki hurung, cucunguk kabeh ngahiji, sabotase tultel timbul, suasana werit rujit, Muawiah nu ngomando.
- Nu dikintun paingan Panglima Amaru nagri Mesir, untungna ti Bijantium, nu dianggap matak watir, ti heula nu disorobot.
- Kajadian kauninga ku Gubernur, teu lami ngirim prajurit, ka Kupah kocap carunduk, Halipah Ali mah nangis, yen Mesir maceuh dirongrong.
205
