Ieu kaca geus diuji baca
- Nyaah teuing ku Gubernur Mesir, sabadana maot, prak dibungkus dina kulit kalde, digebruskeun kana seuney tadi, bareng jeung prajurit, dibubuy lir lauk.
- Kakejeman nu sarupa tadi, nembean katembong, tur ieu mah sagolongan keneh, itu ieu sarua Muslimin, lantaran Politik, wani kejem kitu.
- Nu harirup jumlahna saeutik, kitu ge karolot, nu dipandang geus lalindeuk kabeh, geus dihina karek kenging balik, ampun matak sedih parinuh ku tatu.
- Muawiah ngeunah angen seuri, ieu aing jago, nagri Mesir taluk geus diereh, nu bingung mah ngan Halipah Ali, keur ngarebut deui, tanagana ancur.
- Jendral Amru bukti dua kali, ka Mesir nyorobot, kahijina keur Umar nu ngereh, kaduana nya sidik kiwari, keur Halipah Ali, Amru tetep punjul.
- Harita teh hitungan Masehi, ceuk catetan tambo, dina taun genep ratus keneh, lima puluh salapan mah ahir, taunan Masehi, geus mucuk katung tung.
- Di Mesir mah keur Halipah Ali, tetela geus kosong, ngagantungkeun harapan ge hese, pangaruhna kaciri geus leungit, hasil jahat licik, Muawiah manggung.
- Hawarid teh meh di unggal nagri, sabon poe katon, tur nimbulkeun huru-hara bae, keur Halipah nambihan kapusing, ampir saban usik, mareuman nu rusuh.
- Muawiah ngangseg beuki wani, tur beuki bedegong, salamina nyieun nyeri hate, nyieun neja nu geus lain-lain, ngahina pamingpin, yen Halipah taluk.
- Prajuritna lobana nyalingkir, jeung Halipah adoh, sikepna ge pura-pura bae, sabagian milu ka Hawarid, sabagian nyingkir matak bingung wungkul.
208
