Ieu kaca geus diuji baca
- Pihak Islam geus laporan, ka Madinah utusan kocap tepi, dewan pertimbangan agung, sareng anggota Senat, buru-buru diceluk terus karumpul, sidang kilat musawarah, Panglima Besar nu mingpin.
- Rupa-rupa pamadegan, geus katembong ciciren demokrasi, ahirna terus diputus, dibaca ku Halipah, geus saluyu pikeun ngepung Bijantium, keur ngayonan Roma wetan, nu susumbar ngajak jurit.
- Utusan kocapkeun mulang, balik deui ka markasna di Mesir, di jalanna teu kacatur, jol ka Aleksandria, ku Panglima suratna terus dibantun, ngayakeun sidang darurat, prawira kabeh haladir.
- Putusan sidang darurat, para Jendral katembong leuwih wani, ngucap sukur ka Nu Agung, ngadoa babarengan, menta-menta perangna supaya unggul, kenging rido ti Pangeran, darma bakti ka Ilahi.
Durma
- Laksamana budak ngora maju tandang, ngalirik muril kumis, dangdak-dengdek mandang, ka hareup jeung ka tukang, nulak cangkeng baru seuri, hoak susumbar, hareupeun kabeh opsir.
- Sanggemna teh Bijantium kudu nyerah, taluk masrahkeun diri, ngalawan diganyang, beak dicacar bolang, beresih dibabad pacing, ayonan Islam, awas diburak-barik.
- Para Jendral dipenta kudu waspada, ngatur tugas prajurit, ulah kajadian, nepi ka henteu tenang cul tugas ngantun disiplin, acak-acakan, pinasti matak rugi.
- Pek gerokeun Hubbul wattan minnal iman, atawa mati sahid, ngabela agama, jeung ngajaga nagara, dikepung kaom Yunani pisabilillah, Muslimin yakin kenging.
