Ieu kaca geus diuji baca
- Ngan sakitu kisahna perang lautan, Islam sareng Yunani, nu gede korbanna, ti dua beulah pihak, Bijantium ngacir tebih, Islam nu meunang, teu samar bisa balik.
Asmarandana
- Perang di sisi basisir, lautan Aleksandria, perang rongkah tarung gede, Bijantium sareng Islam, Islam tetela meunang, Bijantium mundur kabur, nu misan mani laksaan.
- Lumpuh armada Yunani, nu ngajajah Laut Tengah, ieu teh hiji totonden, surudna Romana wetan, ancuma karajaan, ti golongan Bijantium, Heraklius turun tahta.
- Yunani mundur ka sisi, Islam nu maju ka tengah, geus kitu kersaning Allah, nu ngaraksa Laut Tengah, sareng Laut Kaspia, urang Bijantium mundur, Islam nu jadi gantina.
- Sanggem bujangga arahli, kawentar nu geus maroyan, ceuk sarjana nu galede, arahli sajarah kuna, majar armada Islam, harita upami maju, Bijantium pasti nyerah.
- Kumargi meureun kaharti, Islam dina kaunggulan, Yunani meujeuhna eleh, geus kasoran di lautan, perang di Laut Tengah, armada ti Bijantium, naringgalkeun medan perang.
- Kasempetan nu mustari, upama dipake tandang, waktu nu meujeuhna hade, keur ngajorang karajaan, Raja Romana wetan, Hiraklius raja sepuh, sakoteap pasti beunang.
- Upami nepi ka hasil, Romana nepi ka beunang, tangtu peta robah kabeh, gambar pikeun sa Eropa, mo cara nu ayeuna, harita langka nu wantun, can aya nu wani tandang.
- Waktu Islam singkil kesit, aksi di Lautan Tengah, bejana beh dieu keneh, saratus taun lilana, ti mentas peperangan, perang rongkah nu ka pungkur, di teluk Aleksandria.
