Ieu kaca geus diuji baca
- Rahayat teh beurang peuting marungkawut, usaha nyiar keur ganti, jeung nu aya narah tepung, sentimen tur mikaijid, amprok ge sangeuk patemon.
- Maranehna hatena mah leuleus nurut, sing saha nu propokasi, teu mikir gasik diturut, teu nolih jasa pamingpin, nu berjoang paeh poso.
- Henteu beda jeung nasibna anu agung, Halipah Usman nu mingpin, jasa dina genep taun, ahirna sedih prihatin, ku rahayat dikoroyok.
- Keur Nagara nambah wewengkon teh untung, dipandang tina politik, pertahanan Islam maju, manis seungit ngahiliwir, geus kaambeu ka nu adoh.
- Usahana golongan musuhna buntu, karaman mah komo deui, Islam ajeg manggung terus, musuhna gigis tur gimir, kantun bingung nanggeuy gado.
- Sababna mah nu matak Islam geus manggung, bogaeun jalan nu penting, sareng Jamal nu kamashur, kaasup ahli ngadidik, tungtunan ti Rasulullah.
- Urang Mesir — Siria — Irak salukur, Parsia ge kitu deui, urut di peres diukur, ku Heraklius Yadajir, ku Islam ngarasa longsong.
- Ku Parsia jeung raja Romawi Timur, atawa raja ti Parsi, diteken pajeg keur hirup, sistim nagihna nu keji, papaksa make bobonggol.
- Kaduana agama anu dianut, ku Persia jeung Romawi, kudu agama ti ratu, Jaratustra jeung Nasrani nurutkeun madhab ortodok.
- Di Islam mah agama henteu diukur, merdika kenging marilih, ukur mayar ji-jah wungkul, nu jumlahna ngan saeutik, opat dirham henteu abot.
