Ieu kaca geus diuji baca
V. GERAKAN DI BAWAH TANAH.<dr>Pangkur
- Dina pupuh nu ti heula, geus tetela aya komplotan aksi, sangkan Pamarentah ancur, anti Halipah Usman, nu datangna ti unggal madhab jeung juru, ti sakuliah nagara, pangpangna ti nagri Mesir.
- Bibit buit kajahatan, pacogregan nu nyieun hiri dengki, ti golongan nu teu jujur, katelah Abu Saba, nenehna teh Ibnu Saoda murugul, Yahudi ti pagunungan, ti Basroh geus nyiliwuri.
- Asup Islam pura-pura, geus ngahaja sakadar pikeun taktik, Islam keur sumput salindung, supaya teu katara, hatena mah ka Islam wungkul ngamusuh, buleud satru kabuyutan, Halipah dipikaijid.
- Ku ayana sipat pitnah, kiritikan dibungkus ku politik, nu geus nyedek maju terus, ditujukeun ka Usman, maksudna mah Halipah supaya turun, turun tahta medal sila, harita gasik diganti.
- Iber kabar geus sumebar, geus katampi ku Halipah pribadi, Pusat Pemerintah ibur, Madinah eundeur oyag, pangagung teh sadayana timbul bingung, Halipah teh terus terang, ngayakeun putusan resmi.
- Harita teh taun Hijrah, tilupuluh jeung lima geus meh ahir, nurutkeun itungan umum, taun genep ratusan, lima puluh jeung lima tambahna mutung, Halipah nyieun malumat, pikeun sakabeh propinsi.
- Dina rayagung nu datang, disuhunkeun sadayana sarumping, sakabeh para Gubermnur, sakumaha biasa, rapat dinas saperti sasih kapungkur, di Pusat Pamarentahan, ka Madinah kabeh hadir.
