Ieu kaca geus diuji baca
VII. HALIPAH USMAN WAPAT.
Durma
- Ti mimiti karaman asup ka kota, pemberontak nu keji, pamarentah Usman, karasa tambah panas, mun kiwari meureun krisis, beda rasana, harengheng tambih genting.
- Madinah teh asup kana pendudukan, sidik pinuh dieusi, kaom pemberontak, golongan anti Usman nu sipatna beuki wani, gaya tarandang, tembong pating garidig.
- Abu Saba sesepuh kaom karaman, lanjang linjing nyeh seuri, maksudna laksana, umat Islam barontak, dasar Yahudi cunihin, ahli pitenah, nyieun nyeri pamingpin.
- Ku hanjakal umat Islam teu arinsap, teu luak lieuk deui, saha nu ti tukang, nu ngasut tur mapanas, nyieun rusuh ka Muslimin, diadu domba, sidik dalang Yahudi.
- Geus tetela Muslimin nu keur barontak, kabeh buta politik, teu panjang emutan, tur teu panjang jeujeuhan, Muslimin kontra Muslimin, perang sudara, teu inget asal kawit.
- Suasana aya dina pergolakan, henteu mandang pamili, teu pasang curiga, hilap purwadaksina, Madinah dianggap asing, beurat sabeulah, Halipah kudu leungit.
- Dianggapna Halipah musuh gerotan, anu wajib dibasmi, dicap penghianat, tur mentingkeun golongan, ngayakeun pamili sistim, nagara ruksak, kitu carek nu anti.
- Waktu solat di masjid mah babarengan, henteu misah ngahiji, Halipah imamna, karaman teh mamumna, rempug jukung hate bersih, iklas nu aya, jiga henteu salisih.
- Kitu deui nalika netepan Jum'ah, umat Islam ngahiji, golongan Madinah, jeung komplotan karaman, di masjid ngesap ngabaris, Halipah imam,jigana hiji taktik.
