Ieu kaca geus divalidasi
- Nu harirup lima puluh rebu urang, kaasup nu inpalid, mundur lulumpatan, ngantunkeun pakalangan, karunya ku nu inpalid, buntung parincang, boborot mandi getih.
- Pihak Islam sarua seueur korbanna, kasoran mati sahid, diurus nagara, dasarna sukalillah, ngarasa geus suka ati, korban berjoang, parentah Maha Suci.
- Jendral Namun nu jadi bunga pahlawan, kasoran geus lastari, anjeunna geus korban, gugur di medan perang, nyumponan parentah Gusti, pisabilillah, sampurna mati sahid.
- Ngan untungna taktik perang pihak Islam, rikat rekep tur rapih, waktu Jendral Numan, kasoran dina perang, disimpen henteu kaciri, taya nu terang musuh mah komo deui.
- Maksadna mah pasukan sangkan teu robah, perangna tetep bengis, sanggeus pertempuran, nembe dibarejaan, yen Jendral Numan lastari, kabeh ngadoa, ka Gusti Maha Suci.
- Kaunggulan peperangan di Nihawan, dingaranan nu penting, ieu kaunggulan, rajana kaunggulan, nu jadi pangeling-ngeling, tentara Islam, Nihawan kota penting.
- Irak Ajam geus taluk ka pihak Islam, diereh ku Muslimin, sakabeh rampasan, dicandak ka Madinah, jumlahna henteu saeutik, mangjuta-juta, Halipah anu nampi.
- Kacaturkeun henteu lila ti harita, Ispandiar ti Parsi, panglima nu lumpat, di luar mepek balad, di kota Rey geus ngadingding, ngalapis waja, nangtangan perang deui.
- Kota Rey teh ku Islam hantem dijorag, musuhna ngacir deui, Ispandiar nyerah, tur ngucapkeun Sahadat, ngahiji jadi Muslimin, jeung tentarana, Yadajir kucar-kacir.
- Raja buron teras nyisup ka Ispalan, di gunung anu buni, kota Rey ku Islam, ti dinya teras tandang, nalukkeun kabeh propinsi, sarta bareunang, Parsi Muklis geus kenging.
130
