Ieu kaca geus divalidasi
- Na ieu mah angkatna pribadi, disarengan ajudan saurang, pangkatna biasa bae, jauh teu burung cunduk najan anggang teu wurung tepi, sumpingna ka Jabiah, kota nu kamashur, markasna tentara Islam, sasumpingna ku Jendral Amru di tampi, kalayan kahormatan.
- Jendral perang sasaruan resmi, ngalaporkeun kaayaan kota, ku upacara militer, pasukan kabeh kumpul ku Halipah geus katingali, anjeunna pok amanat, tur ngucapkeun sukur, ngadoa pikeun suhada, nu lastari keur campuh di medan bakti, tuladeun sarerea.
- Sapronius pandita Nasrani, ngadeuheusan ka Panglima Besar, kiwari meureun Presiden, pucuk pingpinan agung, nu neruskeun keur repolusi, hanca Nabi Muhammad, anu jadi Rasul, kadua ti Abu Bakar, tanggung jawab nungtun umat ka Ilahi, dibawa kana Islam.
- Hasil karya buahna badami, Sapronius jeung Panglima besar, di handap mangga parios, kalayan Anu Agung, Gusti Allah Nu Maha Suci, nyaaheun ka umatna, sim kuring sumujud, hasilna babadamian, ti sim kuring Umar Amiril Muminin, ti Kapala Nagara.
- Keur pribumi Yerusalem asli, perjangjian ti Halipah Umar, jaminan rahayat kabeh, supaya hirup kumbuh, harta banda tatali hurip, sareng kulawargina katut lembur matuh, banjar karang pamidangan, tur gareja mo pisan disisi kudi, kabeh bebas mardika.
- Ka sing saha nu rek nyisikudi, rek ngaruksak sok komo narampas, ieu hal larangan gede, gareja pikeun sujud, sakumaha paham Nasrani, kudu dihormat pisan, tapi nu murugul, teu nurutkeun perjanjian, ti sim kuring baris pinanggih kanyeri, tanwande mendak wirang.
147
