Ieu kaca geus divalidasi
V. HALIPAH ABU BAKAR WAPAT.
Kinanti
- Kocapkeun sasih Agustus, taun genep ratus leuwih, leuwih tilu puluh opat, Abu Bakar geus lastari, taun Hijrah tiluwelas, keur Islam pangeling-ngeling.
- Saterusna nu kahatur, musim haji nu mimiti, anjeunna teu bisa jarah, margina ripuh jeung werit, karaman marajalela, ka Halipah nyieun pusing.
- Nembe ge tiasa ngantun, indit ti nagara Yasrib ka Mekah bade ibadah, nu dimaksud ngalap haji, taun Hijrah dua welas, harita teu pati genting.
- Anjeunna keur waktu cunduk, ka Mekah ngawitan sumping, dipapag ku kahormatan, upacara tata nagri, sakabeh alat nagara, harita kabeh ge nyaksi.
- Umat Islam sami kumpul, nu cageur taya nu kari mapah kapala nagara, ti Madinah nembe sumping, Presiden lamun ayeuna, nelah Abu Bakar Sidik.
- Sanggeus upacara tutup, tatamu nembe marulih, anjeunna angkat nepangan, ka sepuhna nu geus nganti, kahiji ibu-ramana, kadua kabeh pamili.
- Di masjid kumpul ngariung, nu jumlahna teu saeutik, Abu Bakar teras nanya, ka sadayana hadirin, bok aya nu panasaran, atawa dianggap penting.
- Nu kumpul taya nu matur, nu nyarios komo deui, nembongkeun yen kabeh lancar, nagara teu rujit rungsing, anjeunna ngucapkeun bingah, hiji tawis sidik resmi.
- Jisim kuring muji sukur, ka Gusti Nu Maha Suci Mekah teh aman santosa, tuna bangsat sepi paling, rahayat tengtrem ibadah, kahayang kaom Muslimin.
75
