Ieu kaca geus divalidasi
- Ki Mutana aya di wilayah musuh, prajuritna ngan saeutik, ukur kantun tilu rebu, kapaksa ngan jaga diri, nunggu bantuan can tembong.
- Beurang peuting teu lesot muja menekung, ka Gusti Nu Maha Suci, palayeun ditambih batur, keur ngepung musuh nu kumplit, menta-menta geura katon.
- Ngan geus kitu pitulung Gusti Nu Agung, musuhna malundur deui, ka Madain kocap cunduk, ibu kota nagri Parsi, Madain kota nu sohor.
- Di Madain timbul huru-hara rusuh, karaman kocap geus jadi, nu ngamuk ngalawan ratu, kauntungan keur Muslimin, musuhna teu pati nyatron.
- Ki Mutana tentarana nu geus rancuh, malencar henteu ngahiji, harita bisa diatur, dicelukan karumpul deui, jumlahna ngarebu jonghok.
- Ti Madinah banteuan nembe dikintun, dipingpin panglima Jarir, Ki Mutana pok mihatur, meujeuhna rek singkil deui, malikan musuh bareto.
- Abu Jarir ka Mutana nganggap dulur, tekad buleud mati sahid, kajeun ajur moal mundur, sok komo lamun rek ngacir, sanggemna suka ngalonjor.
- Kitu deui prajurit anu kalabur, ka Mutana pok pupulih, beat sumpah ancur lebur, narebus dosa pribadi, niat jihad sabilillah.
- Ceuk Mutana pasukan ayeuna cukup, keur mngayonan lawan jurit, moal mundut anggur maju, nyanghareupan balad Parsi, mo miris pedah karahot.
- Kacaturkeun karaman di Parsi ancur, dibasmi beak beresih, nu beunang terus digantung, nu lumpat nyumput baruni, mileuweungan ka nu jolok.
94
