Ieu kaca geus divalidasi
- hudang, sarta jurutulis kabeh, kitu deui upas-upas, sina nyarieun surat, bewaraan ti kadatun, bejakeun ieu rasiah.
- Kabeh jalma isuk misti, ka Hasan ngarangken Raja, saha nu henteu ngawaro, pasti dihukuman beurat, poma rek sambewara, karep kami eta kitu, lain pikeun lalawora.
- Meralaya gasik indit, ngajalankeun satimbalan, pendek enggeus salse bae, jurutulis rawuh magang, ngadutun nyieun surat, di nagri guyur tagiwur, bung-beng upas pasuratan.
KINANTI
- Teu lami neng pukul tilu, para nyai geus ka cai, purah ngagugahkeun Raja, istri-istri nu gareulis, geus ngebak tuluy darangdan, pada nganggo erok kuning.
- Sarta pada dikukudung, ku sutra buwatan Kasmir, kabeh sarwa pada bodas, nawiskeun setiya ati, tuhu ka Sang Maha Raja, cirining hate beresih.
- Geus dangdan tuluy karumpul, marek pajuwaran Aji, ngantos-ngantos tabuh opat, waktuna Sang Raja tanghi, hempak sami memendekan, semuna kalangkung isin.
- Barang geus dongkap ka waktu, para nyai tuluy ngawih, ngagugahkeun Maha Raja, sarta laguna teh sa'ir, matak waas kakupingna, pok-pokanana malahir.
- Kalangkung matak kayungyun, paningkahna para nyai, sorana angin-anginan, kasipuh ku jempling peuting, tah kieu pokpokanana, ku basa Sunda disalin.
- Mugi agung nya paralun, wireh kumawantun abdi, ngagugahkeun ka Paduka, Sinuhun jungjunan abdi, Ratu Agung Binantara, di Bagdad nu nyakrawati.
- ”Wireh di masjid geus kumpul, sami ngantos Dampal-gusti, sumangga enggal ka jamban, pangsiraman geus sayagi, taya kakiranganana, kantun gusti bae tanghi.”
46
