Toean TORRICELLI njekel doea solobong gëlas anoe make toetoep toengtoengna sabeulah; anoe hidji pandjangna ½ M., anoe sabeulah deui 1 M. Eta doea solobong ditangtoengkeun, dasarna (toetoepna) ti handap; tjoer dieusian erperak něpi ka parinoeh; geus kitoe toeloej dibalikkeun, soengoetna ditoetoep heula koe ramo — harita. geus sadia pinggan beunang ngeusian koe erperak keneh — soengoet eta solobong teroes diasoepkeun kana pinggan tea rada djěro, sababaraha c.M. Toeloej ramona dilesotkeun tina soengoet solobong teh, djadi eta solobong tjitjingna tibalik, ajeuna mah toetoepna tjlok ti loehoer, soengoetna ti handap.
Barang diilikan, solobong noe ½ M. mah, eusina anggěr bae pinoeh; tapi ari solobong anoe 1 M., erperkana toeroen, ngan kari 76 c.M. deui saloehoereun beungeut erperak anoe dina pinggan.
Sanggeus kitoe toean TORRICELLI toeloej deui njoba tjara anoe ěnggeus, tapi ajeuna mah solobongna make anoe pandjang bae sarta leuwih gěde batan anoe tadi.
Ilikan gambar No.1.
Eta solobong boh ditangtoengkeun pantjeg tjara gambar No.1A. atawa ditjondongkeun tjara gambar No. 1B., loehoerna erperakna saroea bae, nja eta tina beungeut erperak anoe dina pinggan teh, anggěr 76 c.M. Dina saloehoereun erperak, eta solobong kosong taja hawaan, koě basa Latijn eta noe kosong teh disěboetna vacuum, pisoendaeunana soewoeng.
Koe pěrtjobaan² anoe geus didjalankeun tea, toean TORRICELLI bisa njieun patokan: daja paneueulna hawa kana perak dina oenggal² 1 d.M² atawa 1. c.M². saroea djeung beuratna erperak anoe roebakna 1 d.M². atawa 1.c.M². loehoerna 76 c.M.
Ari babandingan beurat erperak 13,6. Djadi lamoen erperak atawa tjai koe oerang beunang dipasagikeun atawa dilondjodkeun, erperak anoe roebakna 1 d.M²., loehoerna 76 c.M., eta saroea djeung beuratna tjai anoe roebakna 1 d.M²., loehoerna 13,6 x 76 c.M. = 1033,6 c.M. = 103,36 d.M. Kibikna tjai 1 x 103,36 x 1 d.M³. = 103,36 d.M³
Ari tjai anoe 1 d.M³. beuratna 1 K.G.: djadi di sakoeliah doenja meunang paneueul hawa oenggal 1 d.M². kateueulna koe 103,36 K.G.
Eta paneueul hawa anoe dina 1 d.M². tea, nja eta 103,36 K.G., disěboetna 1 atmosfeer. Koe noe palintěr. atmosfeer, diparake patokan pikeun ngitoeng kakoeatan paneueulna pakakas djeung barang² sedjen; sapěrti: daja paneueulna stoom, kompa djeung sapapadana, kabeh oge diitoengna make patokan atmosfeer bae, nja eta dibanding kana beurat 103,36 K.G. Oepaman daja-paneueulna aja 2 x 103,36 K.G.; 3 x 103,36 K.G.; 4 x 103,36 K.G.; dina oenggal 1 d.M². teh, eta disěboetna 2 atmosfeer, 3 atmosfeer, 4 atmosfeer djeung satěroesna.
