Ieu kaca geus divalidasi
67
- Kajeun lebur bubuk ajur,
lamun katampi ku gusti,
kebatna ieu carita,
kapisutri jero masjid,
pada angkat rerépéhan,
dina wanci tengah peuting. - Kacaturkeun Sayang Hawu,
bari ngagandong Nyi putri,
ari gandek nu tiluan,
dipengkeureunana ngiring,
kébat kaluar ti kota,
Geusan Ulun jeung Nyi Putri. - Ayeuna anu kacatur,
Girilaya jero bumi,
barang ngalilir kulemna,
ngarampa rayi Nyi putri,
teu aya gédébgeunana,
Girilaya hameng galih. - Lajeng Girilaya nyaur,
saurna kamana eulis,
naha mana waka hudang,
kapan ieu masih peuting,
lila digentraannana,
lajeng nyaur eusi bumi. - Ger daratang nu disaur.
dawuhna mana Nyi putri,
geta anu dipariksa,
réh pada kakara nyaring,
sumerah raga jeung pati.
