Na' ari Salamah Nini, bareng dicandak ka Mekah, jeung ibu milu ngaderek, milu indung-beurang jawab, pok deui Salim nanya, bari leumpang terus maju, 'na Nyimas Lurah ka mana.
Paraji ngajawab deui, kapan kapungkur ge ajal, teu damangna tilu poe, Salim cicing teu nyarita, catur bae geus datang, ka bumi Mas Lurah cunduk, gero paraji nyelukan.
Nyimas Umi! Nyimas Umi! nya eta dulur Mas Lurah, di bumina nu tutunggon, torojol bijil ka luar, bareung jeung carogena, Mas Saca papada sepuh, kaget ningal semah datang.
Dimanggakeun sina calik jeung paraji babarengan, tuluy ka jarero bae, dicalikkeun dina dipan, meunang ngamparan samak, barang geus calik ngariung, indung-beurang pok nyarita.
Nyimas meureun lali deui, sumawonna Mas Saca mah, kapan ieu tatamu teh, nami Ujang Salim tea, putra Nyimas Patimah, nu kapungkur geus kacatur, kabejakeun nilar dunya.
Nyimas Umi barang nguping, ngagebeg jero galihna, kutan Salim bari melong, gabrug ngarontok ngusapan, deudeuh anaking Ujang, bari nepak kana tuur, aduh Ujang henteu nyana.
Mas Saca nya kitu deui, godeg jeung unggut-unggutan, nyaurna alon candael, ma'lum anu enggeus sepah, kutan ieu teh Ujang, alhamdulillah nya sukur, aya keneh di kieuna.
Indung-beurang tuluy indit, ngabejaan ka tatangga, atuh rame ear cekcok, tatangga pabeja-beja, pada hayang manggihan, nu bejana geus dikubur, sarta geus disidekahan.
Rabul awewe-lalaki, kolot-budak pada datang, di tengah imah ngaberes, ngalingkung mayit nyawaan, Jang Salim pada nanya, polah jalma nu ngariung, rupa-rupa tina heran.
Aya nu ngajanteng cicing, bari jeung ngusapan dada, gogodeg tina ku kaget, reh kabar geus maot tea, aya nu melong ningal, kaget dumeh Salim segut, gandang siga anak menak.
Aya anu ngomong leutik, tepak toel jeung baturna, pada nyarebutkeun kasep, aya nu nyebut hanjakal, lamun ibuna aya, barudak lanjang pahibut, umat-imut geugeulisan.
