Lurah jeneng desa Sukasari, ka Jang Salim sumeja nepangan, rek nanya surat pangwalon, walon surat kapungkur, pananyana ti Ujang Salim, Salim geus nyanghareupan, 'na korsi dipayun, ceuk Mas Lurah naha Ujang, surat emang walonan enggeus katampi, nyatur ibu ka Mekah.
Ujang Salim ngawalonan manis, anu mawi abdi enggal dongkap, lantaran ngantos pangwalon, ambleng weleh nya nunggu, jadi abdi teu pisan nampi, langkung kesel ngantosan, Mas Lurah ngawangsul, her piraku kapan emang, ngirim surat geus opat poe perecis, sareng poe ayeuna.
Ku taksiran di jalan perewis, Ujang indit meureun surat datang, Salim rada seuri walon, wireh Mas Lurah nyaur, kawalandan perewis percis, ceuk Salim moal lepat, manawi nya kitu, teu sawios ayeuna mah, sawangsulna nuhun miwelas ka abdi, reh kersa ngawaleran.
Ujang Salim nyarita ngabuih, ngawalonan pananya Mas Lurah, rupi-rupi dicarios, lalakonna dijantur, jam sawelas Mas Lurah mulih, Jang Salim poe eta, teu pisan lumaku, balas nemonan ka semah, anu datang henteu eureun ganti-ganti, pada hayang manggihan.
Anu datang awewe-lalaki, henteu lengoh pada babawaan, nu ngajingjing anu ngelek, nandakeun alalakur, kaingetan tawisna asih, rupaning kadaharan, kaolahan kampung, anu leupeut anu kupat, dodol opak cau cara cuhcur wajit, sareng jaba ti eta.
Sadayana anu barang kirim, ngaringetkeun pangasih ibuna, wireh tukang soson-soson, tutulungna di kampung, ahli sidkah ka jalma miskin, sumawon ka nu susah, tina sabab kitu, nandakeun murahna Allah, hade-goreng lahir-batin tangtu bukti, moal rek nyulayaan.
KINANTI.
Kinanti panyambung catur, neraskeun lalakon Salim, sanggeus kadua poena, ayana di Sukasari, meneran keur waktu senang, semah nu datang geus sepi.
