Turunan hade berbudi, alus ti indung ti bapa, najan lain menak oge, asal ka jalma utama, hade tingkah-lakuna, kana gawe teu ngawagu, sarta pengkuh agamana.
Nu kitu anu dipilih, sukur lamun bangsa menak, katambah adatna hade, tinangtu leuwih utama, tatapi sabalikna, najan ka menak luluhur, lamun teu surup adatna.
Ku mama moal ditolih, mending cacah hade lampah, ti batan ka menak goreng, ku Ujang Salim kamanah, akur reujeung manehna, memang kitu nu dituju, bungah ngeunah pipikiran.
Reh sidik geus katalungtik, eta Den Wiryadi tea, turunan bangsa panggede, hade tindak talajakna, terah jalma utama, Salim mikir semu bingung, asa-asa moal wakca.
Papacangan Den Wiryadi, Salamah dulur manehna, maksudna diantep bae, pribumi gancangna angkat, rek nyandak potret tea, caket pintu nu ngagantung, malar ku Salim ditingal.
Ngasongkeun bari ngalahir, tah ieu geuning potretna, eta anu budak keneh, ngarendeng sareng ibuna, anu di sisi kenca, anak mama ngaran Usup, nya eta Wiryadi tea.
Barang breh Salim ningali, erek teu wakca kabuka, reh Salim ngucur cipanon, tina bawaning baluas, suka campur jeung duka, suka dumeh bakal tepung, Wiryadi nu rek dipapay.
Turug-turug geus pasini, Wiryadi bade migarwa, ka Salamah nu dienod, estu kabeneran pisan, ayeuna bisa tepang, jeung uana anu ngingu, ayeuna geus kanyahoan.
Dukana jeung ibu tebih, kawuwuh acan karuhan, bisa tepang deui amprok, Wiryadi sieun kagoda, ku istri anu lian, wireh tangtu kudu nunggu, sumpingna ibu ti Mekah.
Kaduana inget deui, ka dulur nu diteangan, samar teuing bisa amprok, wireh di Petir teu aya, Jaro oge teu terang, Salim banget hayang tepung, kapanggih raratanana.
Barang pribumi ningali, nu aya ngan bati heran, reh Salim ngucur cipanon, erek pok pisan mariksa, kaburu Salim wakca, pokna mugi ulah bendu, sim abdi seja unjukan.
