Gabrug ngarontok ka Salim, nangis bari jeung sasambat, masa Alloh masa Alloh, anak aing henteu nyana, bakal bisa kapendak, teu sangka satungtung rambut, Asep anak dulur mama.
Jang Salim ngahuleng cicing, ngan kaget bae nu aya, bengong bari jeung molohok, teu acan ngarti sababna, pribumi jongjon nyambat, Bisri! Bisri! udah-aduh, kutan Bisri enggeus ajal.
Horeng teh ieu anaking, anak Bisri dulur mama, anu tadi dicarios, lamun teu ningal potretna, hamo teuing rek terang, da ganti ngaran disebut, Sobari geuning ngaranna.
Kabeneran nya milari, ka mama Asep nya datang, paingan ceuk rasa hate, nu aya ngan bati heran, rupa Asep teu beda, reujeung dulur mama estu, Tubagus Bisri ngaranna.
Dulur Ujang teh Wiryadi, anu diteangan tea, aduh kabeneran bae, mama nanya papanjangan, horeng jadi lantaran, pigeusaneun Asep tepung, nyaho marganing wiwitan.
KINANTI.
Jang Salim barang ngadangu, segruk deui bae ceurik, patungku-tungku duaan, ngangres baluas jeung sedih, reh teu pisan dinyanaan bakal paamprok papanggih.
Kasusud anu disusud, wireh dina waktu tadi, panyangka samar kapendak, reujeung anu dipilari, ahir-ahir kabeneran, turunan Salim katungtik.
Sihoreng bangsa Tubagus, terahing menak sajati, pikirna estu teu nyana, dulurna ka Den Wiryadi, paingan kawit patepang, boga ati resep asih.
Jang Salim tambah melenguk, ras deui ka rama eling, mikiran lantaranana, asal-usul waktu tadi, pang ramana luluasan, nilar bale asal jadi.
Cul lembur nilar karuhun, turunan henteu ditolih, henteu mandang sanak-kadang, teu ngemut terah sajati, bet lolos kalunta-lunta, incah ka sejen nagari.
