Dipanggilhkeun ku Gusti Nu Maha Suci, jeung nu baris bela, sakitu ama weweling, dunga mama Haji Iljas.
Barang tamat Den Wiryadi maca tulis, surat nu dibaca, ragrag teu ngaraos deui, ngadaweung bakat nalangsa.
Sarta bari melong pameunteu Jang Salim, dipencrong ditingal, kitu deui Ujang Salim, paheneng-heneng duaan.
Barang enggeus papelong-pelong ningali, bawaning baluas, tuluy ngeluk pada ceurik, pating raringhak duaan.
Den Wiryadi nangis munggah ngabangingik, bakating nalangsa, ngangres-ngenes sarta sedih, pahareup-hareup duaan.
Pada nyekel salampe nadah citangis, diangge nyusutan, sanggeus pada janglar sami, Wiryadi 'na korsi cengkat.
Seug ngaburu nyampeurkeun ka Ujang Salim, bari unghak-inghak, dirangkul bari jeung ceurik, nyariosna pegat-pegat.
Naha ayi mana kaniaya teuing, ka engkang teu wakca, teu nyarita ti tatadi, kutan ayi dulur engkang.
Duh paingan teuing ceuk pangrasa ati, ti barang patepang engkang boga rasa asih, horeng lain anu lian.
Barang enggeus calik deui dina korsi, henteu eureun nyambat, ka rama Tubagus Bisri pokna estu henteu nyana.
Bapa aing geus nepi ka titis-tulis, taya di kieuna, barang keur pada narangis, nu kagungan bumi dongkap.
Enya eta nu dianjrekan Wiryadi, langkung kaget ningal, duaan nu eukeur nangis, lajeng mariksa margina.
Den Wiryadi saprantos janglar ngalahir, abdi ku teu nyana, tepang sinareng pun adi, nya ieu dulur sabapa.
Anu mawi ku abdi dipake ceurik, emut ka pun bapa, nu ku abdi dipilari, sihoreng parantos hilang.
Linggihna teh ayana di Sukasari, nya ieu putrana, wirehna garwaan deui, ka ibu pun adi tea.
Malah anu dicarioskeun ku abdi, papacangan tea, horeng teh dulur sim abdi, anu namina Salamah.
