Kitu deui jeung dulur Wiryadi, gulet geugeut silih pikanyaah, mun keur senang tina gawe, sumawon poe Minggu, Ujang Salim reujeung Wiryadi, mindeng silih anjangan, estu guyub rukun, sakasusah-sakabungah, jadi hiji sapapait-samanis, sabagja-sacilaka.
Kacaturkeun Dolf enggeus bijil, ti H.B.S. lulus eksamenna, kari nunggu-nunggu bae, putusan kana benum, nya eta aspiran kontrolir, bujeng bae enggalna, putusan geus jebul, dikabulkeun panuhunna, dibenumna ka Bandung gawe mimiti, Dolf langkung bungahna.
Sumawonna tuan-nyonya sami, kabungahna teu aya hinggana, Jang Salim mah komo bae, wireh tangtu patepung, reujeung Tarlan sobatna dalit, tina ku sabab eta, ti awal memeh jung, indit nampa pagawean, geus sadia kaperluan bumi-bumi, anu bakal dicandak.
Kitu deui jongos sareng koki, geus dipilih nu baris nyarengan, sinareng Dolf ngaderek, Salim mah enggeus puguh, nyasat tuan rumah pribadi, nu nanggung saeusina, tina sabab kitu, samemeh ka Bandung mangkat, sinyoh Dolf jeung Salim remen badami, tina hal padamelan.
Enya eta nu bakal ditampi, sumawonna jeung ibu ramana, gawena badami bae, malar ngajadi lulus, ramana remen ngaweweling, tata ka amtenaran, nu jadi lulugu, jalanna kasalametan, ceuk ramana poma Dolf masing eling, ingetkeun wuruk papa.
SINOM.
Kacatur bae enggalna, kana waktuna geus tepi, Jang Salim jeung Dolf mangkat, samemeh ka Bandung indit, parabot eusi bumi, sakur nu bangsa perelu, dikirimkeun ti heula, divrachtgud kabeh geus rapih, ti peutingna rame pada sukan-sukan.
Nyalametkeun nu rek mangkat, sapamili sararumping, sobat Dolf sumawonna, Den Wiryadi oge linggih, catur enjingna deui, ka setatsiun enggeus jung, eusi bumi sadaya, ngajajapkeun anu indit, ibuna mah Edith Yus ka Bandung jajap.
Perlu ngurus rumah tangga, malar di dituna rapih, koki jongos
