menak nu lian, kacaturkeun nu mapag pameget-istri, geus naraek ka kapal.
SINOM.
Kabeneran nu duaan, Tubagus Raksa Wiryadi, naraekna pangheulana, barang ka luhur geus tepi, ibu geus katingali teu tata pasini gabrug, dirontok salirana, uba-ibu bari nangis, ibuna mah olohok ngan bati heran.
Disangka nu kasamaran, ibu jeung Mas Lurah deui, nyolondo tatana hormat, semu anu rada isin, wirehing nganggo peci, nyangka menak pangkat luhur, tapak deku sadaya, Tubagus mah jongjon nangis, sarta tungkul nyium sampean ibuna.
Terang-terang ka putrana, geus nyolondo Den Wiryadi, ka ibuna nyariosan, yen eta teh Ujang Salim, barang ibuna nguping, kaget galihna rumanjug, melong kana rarayna, ka putrana nu keur nangis, gabrug deui dirangkul jeung ditangisan.
Kitu deui Nyi Salamah, ngarangkulan bari ceurik, patungku-tungku di kapal, ibuna mehmehan lali, tina bungahna leuwih, teu nyana satungtung rambut, yen eta teh putrana, galihna keur waktu tadi, menak pangkat ngarontok nu kasamaran.
Bujengkeun bae enggalna, sadaya prantos arindit, pada tarururun ti kapal, kaperluan prantos rapih, muru kareta api, ngajugjug ka Kebonjeruk, nu meunang nyadiaan, di bumina Den Wiryadi, sadongkapna teu eureun sarosonoan.
Komo Tubagus Raksa mah, ti ibu teu pisan tebih, dumugi ka wengi pisan, tabuh satu masih nyaring, nyarios ti mimiti, sakur lalakon kapungkur, dicatur teu kaliwat, ibu ngadangukeun tigin, anu aya baluas manah kagagas.
Teu eureun ngucur cisoca, bungah pabaur jeung sedih, Mas Lurah jeung Nyi Salamah, milu ngangres jero ati, Den Wiryadi teu kari, di dinya milu ngariung, Ujang Salim kapaksa, nu moal nyarios tadi, nguningakeun Den Wiryadi saderekna.
Kapaksa bae dibabar, tina geregeteun ati, geus hoyong geura nyarita, kawuwuh ningali rai, Salamah anu geulis, dina sajero
