Ibuna kalangkung bungah, nganuhunkeun ka Wiryadi, reh geus nulung ka putrana, sarta naros asal bumi, jawabna Den Wiryadi, kawit Banten asal-usul, ibu Tarlan sumeblak, emut ka asal pribadi, reh anyeunna oge ti Banten asalna.
Lajeng panjang mariksana, embi ge ti Banten kawit, naha tuang rama saha, memeh walon Den Wiryadi, dipegat ku Jang Salim, saurna ieu pun dulur, sareng abdi sabapa, anu teu nyana teh teuing, baris tepang sami keur pada ngumbara.
Sadayana lalakonna, teu kaliwat diparinci, asal-asalna ramana, pang ti Banten lolos indit, saur uana tadi, teu aya nu teu dicatur, saseepna carita, potret rama waktu kawin, jeung ibuna Den Wiryadi nu teu aja.
Ditembongkeun ka sadaya, ibuna Tarlan ningali, barang breh parantos nyata, leuleus ngeter tulang sandi, henteu tata pasini, Wiryadi gabrug dirangkul, nyambat bari midangdan, anak aing-anak aing, ieu ibu nu ku Asep diteangan.
Nyaur bari dirontokan, Den Wiryadi barang nguping, ibuna anu sasambat, tidinya mah gabrug deui, ngarontok bari nangis, udah-aduh uba-ibu, nyuuh kana lahunan, nyaurna teu nyana teuing, jisim abdi jeung ibu bade papendak.
Sadaya anu naringal, arolohok milu sedih, ningal nu silih rangkulan, pada hareran ningali, sanggeus jalanglar sami, ibuna lajeng cacatur, tina asal-usulna, pang aya di T nagari, kawit mapay ngilari rakana tea.
Reh anjeunna kenging beja, pangna ka T teh ngilari, aya anu ngawartosan, tapi maksudna teu hasil, estu teu nyana teuing, rakana anu disusul, deukeut bae teu anggang, ti kota tilu pal leuwih, ku anjeunna Sukasari teu kasorang.
Sadayana lalakonna, waktu anjeunna ngilari, dicaturkeun teu kaliwat, margina teu mulih deui, ka Banten asal tadi, tina bawaning ku bingung, lantaran sawan kuya teu aya keur ongkos mulih, nya bubujang di ramana Encep Tarlan.
Teu lami istrina hilang, nya prok ka anjeunna kawin, nepi ka kagungan putra, buktina Cep Tarlan hiji, nya nepi ka kiwari,
