oelin djaoeh djeung batoerna, sarta njoesahkeun ka kolot-kolotna. Barang geus tjageur, manehna mindeng ingět kana kasakitna, sarta henteu daek-daekeun deui djadjan.
XXIV. HAHAJAMAN.
Dina hidji sakola aja sawatara moerid awewe, ari noe panglobana moerid lalaki. Barang dina poekoel sapoeloeh, nja eta waktoe eureun, goeroe toeloej njaoer ka moerid-moeridna: „Pek, baroedak geura aroelin tjara sasari.”
Toeloej baroedak awewe karoempoel di těpas sakola sabeulah kaler, sědjana arek oelin kapoentjeng. Ari baroedak lalaki aroelinna diboeroean sabeulah kidoel.
Tidinja silih-adjak djeung batoerna, sabab pada baroga karěp, aja noe ngadjak oetjing-oetjingan, aja noe ngadjak hahajaman djeung sadjaba tidinja.
Diantara eta baroedak aja hidji boedak anoe pangdjagdjagna ngaranna Mardi. Tjek Mardi: „Hajoe euj oerang oraj-orajan!” Toeloej baroedak teh ngantaj, tatapi henteu toeloej oraj-orajanana, sabab reja noe ngomong: da bongan sok pěgat.
Tjek Mardi: „Ih, ajeuna mah oerang hahajaman bae.”
Tjek Sanoesi: „Hajoe, da hahajaman mah rěsěp, koering hajamna.”
Tjek Mardi: „Hajoe, kadjeun teuing dewek mah tjareuhna oge.”
Tidinja toeloej baroedak teh patjěkěl-tjěkěl leungeun sarta ngalingkoeng njijeun kalang; aromongna: „Pek hajamna geura asoep.”
