Ieu kaca geus divalidasi
26
- Katjarita hidji waktoe, kira wantji tĕngah peuting, datang rampog pirang-pirang, ka lĕmboer ki djoeroetani, geur soerak gĕro noe nangtang, tingsarijĕng sora bandring.
- Ngagoeroeh sora pamĕntoer, rampog njĕsĕg njatjar bilik, raden Pandji geus tangginas, ki Daheng ĕnggeus tarapti, Daheng geus matĕk badina, raden geus mĕtakeun kĕris.
- Ki Daheng djeung Pandjiwoeloeng, ngamoek barĕng ngarah pati, kapala rampog noe keuna, mimitina ngadjoempalik, batoerna kabeh naradjang, geur tjampoeh noe ngadoe kĕris.
- Rame gĕloet pada hatoer, powek wantoening ti peuting, bangke ĕnggeus pagoletak, beuheung kawas badan patjing, ngan kari djalma toedjoehan, ditjĕrĕk koe raden Pandji.
- Begal toedjoehan geus taloek, katjatoer ki djoeroetani, njeungeutkeun obor djeung damar, rek ngoboran noe prang tanding, sarehna geus repeh prangna, heran pikir djoeroetani.
- Ningal majit geus patoempoek, patoempang patindih-tindih, saha noe ngalawan inja, teu njana ka raden Pandji, toeloej raden Pandji poetra, ngalahir ka djoeroelani.
- Gĕgĕrowan sisi lĕmboer, ijeu koela njĕkĕl maling, geuwat bawa eta damar, bisi maling leupas deui, aki djoeroetani loempat, njampeurkeun ka raden Pandji.
- Bari mawa obor hoeroeng, raden Pandji djeung Bramani, kasampak keur njĕkĕl djalma, toedjoehan patoempang-tindih, beunang ngabanda leungeuña, dikantet didjijeun hidji.
- Ki djoeroetani kalangkoeng, kaget sadjĕroning ati. pok naros ka Pandji poetra, he agoes intjoe si aki, ijeu koemaha pĕtana, matak kaget teuing aki.
- Itoe di boeroewan pinoeh, koe majit patoempang-tindih, ijeu di dijeu toedjoehan, noe hiroep geus njandang tali, tjik agoes aki bedjaän, djeung saha ngalawan maling.
- Raden poetra Pandjiwoeloeng, mesĕm barina ngalahir, batoer pĕrang ngan doewaän, nja ijeu Daheng Bramani, ki djoeroetani njakakak, seuri bari baksa rangin.
