Kaca:Poesaka Soenda 1923-04-1(10).pdf/3

sakoelah-sakolih ngaranna Maritja. Nja Maritja tea anoe parantos kaerong koe andjeunna baris eupan pigeusaneun ngalaksanakeun-kahojongna. Awitna Maritja tiasa meper amarah Rahwana koe saoer panglilipoer soepaja napsoena oelah didjoedjoer, nanging Rahwana ènggal kagèmbang deui koe kaendahan Dewi Sinta sareng kahoedang koe panging-kilikan Sjoerpanakha.

Maritja ngadjadikeun maneh oentjal kantjana oedat salaka loempat ngaliwat ka tempatna Dewi Sinta.

Dewi Sinta kaoesap gogoda, kabongroj koe oentjal kantjana, keukeuh ka rakana miwarang soepaja ènggal ditèwak. Koe Lakshmana dihatoeranan wawadi, jèn eta njata goda rantjana, margi mohal di doenja aja oentjal anoe kitoe roepana.

Nanging tina bangeting panarik adjian gendam Maritja, Sinta lali kana wisiking panggalih, weleh teu kenging dipondah. Batara Rama ngaboedjeng oentjal tèa, dihaben disoesoel-soesoel, doepi garwa ditimbalan didjagi koe raina. Sabot Rama teu aja Dewi Sinta ngadjoedjoeroeng ka Lakshmana miwarang ingkah, kedah njoesoel ka rakana reh ngadangoe sora titiron, sada Rama moendoet toeloeng. Lakshmana kapaksa ngantoenkeun Dewi Sinta njalira.

Nèmbe pisan Lakshmana angkat, djol djleg baè Rahwana soemping, anggoan mah kapanditaan; awit ngaririh-ririh koe saoer manis, loemah-lameh bangoen nénéh, moedji- moedji hojong mangkon ngadjakan angkat ka Lengka. Nanging koe margi Dewi Sinta teu kenging dionggét-onggét, toengtoengna rijed baè dipaksa diemban bioer ditjandak ngapoeng.

Dewi Sinta djoemerit nangis, kotjèak dengek sasambat ka Batara Rama, nanging moebah teu aja goenana, rakana tebih dieupanan digagalak koe oentjal kantjana Maritja tèa.

Kaleresan teu sakoemaha tebihna, kakoeping koe hidji garoeda anoe ngaranna Djatajoe, mitra Radja Dasjaratha ramana Batara Rama, djoemeritna istri anoe sasambat tèh, atoeh ènggal diboedjeng, sarta barang bèh katingal Rahwana dina karètana keur ngeukeuweuk hidji istri, gaproek baè karèta emas disamber digitik doegi ka remoek. Rahwana napsoe ngagoegoedoeg sot karèta, ger

merangan garoedag sarta teu lila habek Djatajoe di tilas koe pedang, mèh rantas djangdjangna sabeulah sarta kolèang Djatajoe ragrag, teu tahan njangga pangawasana Rahwana, ambroek ngaloemboek di tengah leuweung geus teu daja teu oepaja.

Rahwana kebat ngapoeng ngawang-ngawang, Dewi Sinta dipageuhan, ngabioer moelih ka Alengka.

Sabot dipangkon ditjandak ngapoeng teu kendat Dewi Sinta sasambat, djerit-djerit nangis maratan langit; Samar polah samar ragap, reuwas taja papadana, nandang siksa tanpa dosa. Moeroeboet soesoebal ragrag tina sanggoel, geulang kangkaloeng aroetjoel, njarahtjal sadjalan-djalan.

Soegri anoe koemelip di alas Dandaka hareugeu bengong haroong, ngenes ngangres ngiring sedih, ngoeping djoemeritna poetri, kotjèakna noe sasambat, nanging rakana djeung raji, koe Maritja dibangbatkoun, kabèngbat oentjal hianat.

Tatangkalan dangdaoenan ting harelab gedag ojag, kasilir koe angin leutik, tawis ngiring sedih peurih, ka Sinta noe keur prihatin, noedjoe toenggara nandang soengkawa.

Kekembangan noe rek mekar, ngoelapes doemadak leumpeuh, aloem lir kapoepoel bajoe, toemoengkoel mariloe ngoengoen.

Sinar srangèngè teu tjékas, haleungheum angkeub rareueuk, mesoem kasapoet halimoen, mega djiga noe teu tega.

Ngahiliwir angin ngadalingding, sada miloe hoemandeuar, pèdah toegenah ningal Rawana:„Leungit adil tanpa lebih,nandasa noe tanpa dosa, Rahwana ngiwat Sinta garwana Batara Rama:”

Kai bati djadi saksi, kakajon tembong barengong miloe sedih ngiring njeri, tapi teu bisa madjar koemaha.

Goenoeng-goenoeng miloe ngoejoeng, sato hewan riab pasoelabrengan, taranggah ka awang-awang, kawas noe miloe ngadeudeul pindoenga ka Sinta: „Masing teger, masing panger, oelah keder oelah gimir, poma gedag kaanginan, moega manah masing djanglar, waloeja diraksa koe pangawasa.”"

Nadjan Sinta kotjèak dengèk tapi Rahwana kendel bandèl, teu aja pisan rasrasanana.

Soempingna ka Langka, boes Dewi Sinta

147