Tuan Yasper tamu tea, nguping Jang Salim wawarti, nyebatkeun ngaran ramana, katelahna Mas Sobari, semu nu heran teuing, wirehna waktos kapungkur, anjeunna sasarengan, sareng nu nami Sobari, tuan Yasper ti dinya deui ngandika.
Boa bapa maneh tea, nu ku urang diilari, sabab urut batur urang, digawe bareng ngahiji, jalma urang pribadi, babarengan taun-taun, ka urang estu bela, pisah-pisah urang balik, ka Eropa perlop tina pagawean.
Tapi barang urang datang, ka dieu balik ti nagri, bapa maneh geus teu nyampak, diteangan teu kapanggih, ngan meunang beja sidik, ka urang anu cacatur, nuturkeun ka bojona, matuhna aya di Petir, karsidenan Banten bawahan Pandeglang.
Malahan urang nyuratan, ka Sobari nu di Petir, tapi teu meunang walonan, ti wates harita sepi, urang teu panggih deui, nepi ka ayeuna luput, teu beja-beja acan, geus sapuluh taun leuwih, malah-malah bareto lamun teu salah.
Aya nu datang ka urang, ngakuna anak Sobari, ngaprak neangan bapana, nanyakeun reh waktu tadi, reujeung urang ngahiji, babarengan gawe campur, atuh urang ge heran, eta anakna Sobari, ngaku ngaran Usup matuh di Pandeglang.
Malah-malah eta budak, ku urang dibere duit, eukeur bekelna neangan, sarta jeung dipesen deui, upama geus kapanggih, kudu datang buru-buru, bawa ka imah urang, reh sono hayang papanggih, tapi nepi ka ayeuna euweuh beja.
Teu anakna teu bapana, lamun kitu boa sidik, bapa maneh nu geus ajal, nu ku urang diilari, meureun bojoan deui, ka indung maneh geus tangtu, tuan Yasper mariksa, 'na maneh teu meunang warti, sugan bae indung maneh cacarita.
ASMARADANA.
Memeh bapa maneh kawin, jeung indung maneh baheula, naha enggeus boga bojo, ka urang Banten Pandeglang, Salim jawabna duka, pun biang henteu cacatur, geus istrian ka nu lian.
