Tina apik sarta suhud, barang diitung ku Salim, geus aya saratus perak, ceuk pikirna eta duit, rek dikintun ka ibuna, nu aya di Sukasari.
Salim ngahaja kukumpul, lain gunana pribadi, tina inget ka ibuna, bumina geus ruwang-rawing, wireh sakitu lilana, ditinggalkeun ku Jang Salim.
Enggeus tangtu tambah butut, pikirna teh eta duit, keur ngahadean imahna, Salim ka nyonya permisi, poe eta rek ka pasar, balanja pikeun kikirim.
Ceuk Salim ka nyonya nyatur, sim abdi lami teh teuing, ka pun biang teu ngabaran, kaayaan jisim abdi, salamina keur ngumbara, abdi melang liwat saking.
Sareng sim abdi kapungkur, ka pun biang prantos janji, mun abdi gaduh usaha, rek kukumpul kanggo ngirim, eukeur ngahadean imah, reh parantos butut rawing.
Ayeuna sataun langkung, abdi nembe bade ngirim, nuhun ku pitulung nyonya, nyasat nyonya nu maparin, wirehing artos pasihan, gajih abdi saban sasih.
Ku abdi disimpen terus, belaan mengkek sim abdi, kana sagala kahayang, tina emut siang-wengi, ka pun biang nu di tilar, nu aya di Sukasari.
Saur nyonya atuh sukur, mun Alim inget ka wajib, bela ka indung nu heman, memang nya kitu anaking, na' geus boga sabaraha, simpenan nu rek dikirim.
Walon Jang Salim saratus, saur nyonya naha mahi, pikeun ngahadean imah, jeung meuli pikeun kikirim, ceuk Salim taya petana, cekap pimanaeun teuing.
Ngan tawis ti abdi emut, kawantos rorompok lami, ti saemut abdi pisan, geus nyampak acan diganti, butut prantos arucutan, bilik tambal hateup iris.
Malahan waktos kapungkur, waktos abdi masih leutik, upami ger aya hujan, pun biang bingungeun teuing, reh iris sakuliahna, sakapeung abdi sok ceurik.
