Lamun wengi keur ngaringkuk, keur ngeunah sare ngajempling, upami ger dongkap hujan, maksa bae kedah nyaring, kanu iuh pipindahan, reh irisna sakuriling.
Ngilari tempat nu iuh, iris nu teu ageung teuing, sakapeung mah teras pisan, tara hees sawewengi, ngedeng bari babaseuhan, kairisan teu ditolih.
Nyonya Opzichter ngadangu, welaseun kaliwat saking, bari pok deui mariksa, naha teu boga pamili, nu rada cukup jeung heman, nulung ka baraya miskin.
Ceuk Salim nya eta atuh, sadaya pamili abdi, henteu aya anu cekap, aya ge sipat nu tebih, carang anu marosea, tara nolih ka nu miskin.
Watek dunya memang kitu, najan pamili nu sugih, mun teu boga sipat welas, miasih ka jalma miskin, tara nolih sanak kadang, susah miskin teu merduli.
Memang geus jadi pitutur, paribasa nini-aki, gunung luhur disaeuran, tanah nu legok dikali, eta kitu ibaratna, menggah ka jalma nu miskin.
Batan diaku ditulung, tara pati diperduli, teu cara ka anu beunghar, ka nu jeneng sanes deui, najan anggang ditareang, deungeun diaku pamili.
Nyonya Opzichter ngadangu, muji dina jero galih, pok deui nyonya mariksa, ku lantaran maneh miskin, bapa maneh teu usaha, lantaran nandangan gering.
Na ti mana pikeun hirup, dahar pake bisa manggih, ceuk Salim saaya-aya, ihtiarna indung abdi, buburuh sinareng dagang, ngarah sautak-saeutik.
Sakadar keur landong luput, landong peurih peujit teuing, sadinten sakali neda, mun pareng aya rejeki, upami keur teu aya mah, cekap ku sampeu sahiji.
SINOM
Salim panjang nyaritana, nyatur hirupna diwincik, nyonya welaseun kacida, milu ngangres sarta sedih, barang Salim rek indit,
