ka pasar meuli keur ngintun, nyonya angkat ka kamar, nyandak artos tina laci, wang keretas sapuluhan lima lambar.
Saurna ieu nambahan, bisi duit henteu mahi, pikeun ngadangdanan imah, ieu keur meuli kikirim, reujeung caturkeun deui, ka indung maneh di lembur, kirim tabe ti urang, suratan bae sakali, mun daekeun ka dieu disina datang.
Salim nganuhunkeun pisan, enggalna ka pasar indit, balanja meuli pakean, meuli encit reujeung samping, aralus meunang milih, keur Salamah reujeung ibu, dua pangadeg sewang, malah keur Salamah leuwih, meuli suweng ali katut kongkorongna.
Sajaba meuli pakean, meuli surutu sapeti, keur ngiriman ka Mas Lurah, reh inget keur waktu tadi, eta nu bela pati, ngurusan ramana pupus, sanggeus balik ti pasar, sadatangna gusak-gasik, gesret nulis keur ibu kieu unina.
Sinarengan ieu serat, abdi kikintun saeutik, rupi pangganggo jeung arta, kangge ibu jeung pun adi, lumayan tawis eling rupa artosna saratus, sinjang sareng raksukan, geulang kongkorong jeung ali, panganggona dua pangadegan sewang.
Sareng sajabi ti eta, mugi teu jadi panggalih, wireh abdi kalamian, nembe ayeuna wawarti, sanes pisan teu eling, emut mah teu suwung-suwung, ti barang abdi nilar, ngan bati di lebet ati, margi elat ka ibu teu ngawartosan.
Maksad abdi nyangkirangan, ka sepuh anu miasih, wireh salami ngumbara, abdi nandangan prihatin, lamun abdi wawarti, bilih ibu jadi ngangluh, lalakon anu panjang, hal kaayaan sim abdi, teu dicatur dina lebet ieu serat.
Engke bae ari tepang, lalakon abdi diwincik, menggahing waktos ayeuna, pangestu rahmat Yang Widi, nuju wilujeng abdi, berhak pandungana ibu, aya di Mataraman, apdeling Mesterkornelis, ngiring sareng tuan anu mikaheman.
Sareng naros sawangsulna, di dieu di Sukasari, slira ibu jeung Salamah, kumaha wilujeng sami, abdi pasihan warti, Ya Allah abdi teh ibu, ti kawit abdi nilar, ka ibu teu petot eling, tina melang sering ragragan cimata.
