Ibu oge moal beda, tinangtos kitu ka abdi, waktos nandangan sangsara, abdi aya di Batawi, jalaran nandang gering, di rumah sakit ngaringkuk, teu aya nu kacipta, ngan ibu sareng pun adi, reh nyamarkeun abdi bisa deui jagjag.
Menggahing perkawis eta, mun taya pambengan abdi, engke dina waktos senang, tinangtos abdi permisi, wangsul ka Sukasari, tina sonona kalangkung, jeung ibu hoyong tepang, sumawon sareng pun adi, kumacacang katingal bae 'na mata.
Menggahing abdi ayeuna, kaayaan di Batawi, ibu ulah alit manah, mugi teu jadi panggalih, nuju keur senang ati, kenging rahmat ti yang Agung, ulah kirang pangdunga, malar hasil maksad abdi, sugan pareng bisa ngamulyakeun sepah.
Waktu ieu sing wayahna, nampi ka papasten Gusti, di lebet kawaluratan, sugan ka payun kapanggih, ganjaran Maha Suci, babales sabar jeung sukur, ibarat anu nanjak, piraku bae nangtawing, geus tinangtos mendak mudun jeung ratana.
Sajabana nu kasebat, ieu surutu sapeti, lumayan kanggo Mas Lurah, kagegelan ti sim abdi, tawis abdi miasih, mugi sanggakeun ku ibu, sareng kumaha damang, Mas Lurahna jaler-istri, panghaturkeun abdi ngahaturkeun salam.
Sareng upami kintunan, ku ibu prantos katampi, mugi enggal ngawaleran, ulah deudeupeun sim abdi, adresna dina tulis, ieu ku abdi dikintun, Kapada Salim p/a, tuan Opzichter J. Berling, Meester-Cornelis Matraman nomer 5.
Saenggeus surat ditanda, dibaca sakali deui, bari ngucur cipanonna, ngangres ka ibuna eling, diuk bari jeung mikir, ngemut-ngemut nu dicatur, surat bisi kaliwat, aya nu perlu ditulis, gesret deui tanda N.B. ditambahan.
Nyarioskeun Salim pisah, jeung Tarlan henteu ngahiji, malah dugi ka ayeuna, teu acan papanggih deui, sarta ditulis deui, pesen dunungan dicatur, kirim tabe ti nyonya, saenggeusna surat rapih, diasupkeun kana pospakket bungkusan.
Bujengkeun bae enggalna, mungkus paket geus tarapti, dikurawet geus dielak, terus dikirim sakali, peutingna Ujang Salim,
