mieling, teg nyangka boa-boa, ibuna geus pupus, satungtung jero papisah, pikir Salim sabab mun aya di bumi, moal teu katarima.
Ngeruk leuleus cipanonna bijil, rusras inget deui ka adina, lamun ibuna geus maot, saha nu baris ngurus, nu maraban sarta miasih, Salim tambah baluas, cipanon nyurudut, nyonya Opzichter ngupahan, poma Salim ulah pake leutik ati, reh paket teu katampa.
Acan puguh boa-boa teuing, indung maneh teu aya keur nyaba, Jang Salim alon ngawalon, abdi nu mawi ewuh, salamina reh indung abdi, teu ara pisan ingkah, nyaba ka nu jauh, sumawonten tebih tea, ka tatangga oge mun teu perlu leuwih, arang anjang-anjangan.
Ku sim abdi nu diangge risi, boa-boa pun biang geus ajal, saha nu baris nyarios, ka abdi nu cacatur, mun pun biang di Sukasari, teu aya di kieuna, abdi nu kaduhung, wireh abdi salamina, geus sataun satengah henteu wawarti, nembe pisan ayeuna.
Jadi tangtos moal aya warti, saha anu baris nyariosan, sim abdi anu lepat teh, tina ku margi kitu, lamun yaktos dugi ka pati, Salim jeung unghak-inghak, cipanonna ngucur, soarana pegat-pegat, abdi emut ka Nyi Salamah pun adi, saha nu mikaheman.
Geus tinangtu sangsara prihatin, payun nyonya Salim kokosodan, bawaning ku ngenes hate, sasambat uba-ibu, latlatan satengah teu eling, ku nyonya diupahan, sarta milu ewuh, ngadeg ditungtun ka kamar, saur nyonya Alim ulah rusuh teuing, nyangka indung geus ajal.
Acan puguh sabab acan sidik, ayeuna mah seug reureuhkeun heula, malar jadi janglar hate, ngedeng di tempat tidur, hate pasrah ka Maha Suci, perkara Si Salamah, lamun enggeus puguh, ulah rek pake kamelang, kapan aya urang anu bela pati, tinangtu diurusna.
Angguran mah seug sakali deui, ka Lurahna nanya nyieun surat, kirim prangko keur ngawalon, lamun enya geus puguh, kaslametan di Sukasari, atawa mun geus ajal, Salim buru-buru, mulang ngala Nyi Salamah, paneda mah muga ka nu Maha Suci, indung maneh waluya.
