Dililipur ku saur nu manis, diupahan nu dipalar janglar, sinyoh Yus nya kitu keneh, deukeut Salim candukul, milu ceurik bawaning sedih, melong kana beungeutna, Salim nu keur ewuh, sinyoh Yus teu ngajauhan, diusapan sukuna bawaning asih, sapoe henteu incah.
Sinyoh Dolf oge kitu deui, sadatangna balik ti sakola, ka Salim ngupahan bae, ku tiluan diriung, poe eta Salim teu bijil, ngahephep di jro kamar, isukna kacatur, Salim jam dalapan mangkat, ka poskantor Mataraman mawa resi, surat panggilan tea.
Catur bae paket geus katampi, Ujang Salim buru-buru mulang, bari jeung ngajingjing paket,weuteuh masih dibungkus, sadatangna tret Salim nulis, surat keur ka Mas Lurah, nu aya di lembur, nu jeneng jeung nu pareman, duanana dilampiran prangko hiji, keur ngawalonanana.
Ungel surat duanana sami, enya eta naroskeun ibuna, gancang dikirimkeun bae, Salim sajero nunggu, walon surat ti Sukasari, atina henteu janglar, remen huleng-jentul, malah ku Nyonya dicaram, kana gawe remen dititah pelesir, jeung Dolf reureujeungan.
Kilang kitu henteu daek lali, poho ukur satungtung keur nyaba, gawena ngajentul bae, teu ara puguh laku, mun ti peuting ngan gulang-guling, teu pati sasarean, henteu weleh emut, ka ibu nu dipicangcam, turug-turug geus meh rek saminggu leuwih, acan meunang walonan.
Beurang-peuting tara ngeunah cicing, ngarep-ngarep surat ti Mas Lurah, tapi amleng lebeng bae, enggeus saminggu langkung, ngagelendeng sajero ati, ka Mas Lurah pareman, ka nu jeneng kitu, pokna abong-abong pisan, kena-kena ka jalma cacah tur miskin, bet embung ngawalonan.
Sakapeung mah ku nyonya kakuping, lamun Salim ngomong keur amarah, tina banget jengkel hate, nyonya teu weleh imut, ngabeberah bakating asih, saurna Alim sabar, ulah buru-buru nyalahkeun nu acan nyata, boa teuing pang henteu ngawalon gasik, bisi aya halangan.
