Pikir Salim tugteg ratug, salempang samemeh indit, pukul opat enggeus hudang, geus beberes sarta mandi, babawaeun geus sadia, pospakket reujeung tas kulit.
Ujang Salim dangdan segut, make kebat payus ginding, sasawit reujeung iketna, jasna bodas beunang ngistrik, bukaan dasina malang, teplekna palingpang gading.
Sarta tuluy gusat-gesut, ngompa sepelda geus rapih, nu Dolf pranti sakola, anyar keneh beunang meuli, pelekna masih ngagenclang, Dolf oge geus sayagi.
Rek nganteur ka setatsiun, tuan-nyonya geus taranghi, erek nyalametkeun jalan, ka Salim nu erek balik, geus nepi kana waktuna, pukul genep baris indit.
Tuan Nyonya geus ngariung, sinyoh Yus geus juba-jebi, nyalalangkrung cipanonna, hayang milu ka Jang Salim, samemeh Jang Salim mangkat, ka sinyoh Yus anu leutik.
Ngarangkul bari dicium, diupahan budi manis, nyonya-tuan tatabean, jeung dipesen wanti-wanti, dicaram ulah rek lila, gancangna tuluy arindit.
Dolf jeung Salim ngadudud, tumpak fiets papada ginding, sajalan-jalan ngocomang, ngomong Walanda ngabuih, saha bae anu nyangka, Salim asal urang sisi.
Turug-turug bareng campur, jeung sinyoh nu make peci, murid H.B.S. Salemba, kabeh nyangka ka Jang Salim, murid sakola amtenar, turunan pangkat bupati.
Datangna ka setatsiun, nya eta Mesterkornelis, meneran tempo ngajual, pahibut nu meuli karcis, Salim meuli pangheulana, beres senang geus tarapti.
Sepeldahna geus diurus, ku kuli plat geus dicangking, dibawa kana kareta, paranti tempat bahasi, Ujang Salim ngajingjing tas, tasna kulit anyar leutik.
Kewes pantes segut lucu, jalan-jalan mundar-mandir, reujeung Dolf rerendengan, teu antara lila deui, dengek karetȧ disada, menta sinyar geus ngajerit.
