Nu rek tumpak geus pahibut, Ujang Salim geus tarapti, barang kareta geus datang, Ujang Salim gusak-gasik, reujeung Dolf tatabean, sosonoan memeh indit.
Tuluy bae gura-giru, naek ka jero dareksi, kabeneran meunang tempat, diukna 'na bangku sisi, geus neng sora lonceng dua, tanda kareta rek indit.
Barang geus neng loceng tilu, Salim tatabean deui, samemeh pluit disada, Salim ngagebeg jro ati, wireh ningal nu ngajega, Den Wiryadi make putis.
Jang Salim bati rumanjug, kareta kaburu indit, kaduhung teu tepung heula, teu katingal ti tatadi, nu kapanggih di Karawang, Salim sumeblak nya ati.
Kareta api geus tuluy. Jang Salim ngadaweung mikir, atina bati hanjakal ras ka Encep Tarlan eling, ngomong di jero atina, duh aing hanjakal teuing.
Ti bareng amprok kapungkur, aing acan pisan lali, jeung nu panggih di Karawang, geus meh rek sataun leuwih, ku aing dihaja-haja diteangan teu kapanggih.
Bet ayeuna ari tepung, henteu kabeneran teuing, aing teu kaburu nanya, mun disampeurkeun ku aing, meureun meunang katerangan, sugan jeung Tarlan papanggih.
Jang Salim bati melenguk, rusras rea nu kaeling, eling ka nu rek disorang, kaayaan Sukasari, hayang buru-buru datang, geus asa prok bae panggih.
Ibu nu pake kaemut, ka Salamah kitu deui, tingseredet tingsareblak, atoh pabaur jeung risi, risi sieun henteu nyampak, atoh lamun geus papanggih.
Enggalna bae dicatur, Krawang Cikampek Cimahi, Bandung reujeung Cicalengka, geus kaliwat ku Jang Salim, kareta cepet lumpatna, Jang Salim geus tereh tepi.
Beuki deukeut beuki ratug, katingal bae ku ati, hayang buru-buru datang, geura jlog di Sukasari, beuki deukeut nu diseja, beuki kesel nganti-nganti.
