Najan kreta ngabadudud, ngaheong ngaberung tarik, rarasaanna ngarayap, bujengkeun bae perkawis, anggang moal burung datang, jauh moal burung tepi.
ASMARANDANA.
Ka setasiun T tepi, kurang-leuwih pukul lima, Jang Salim turun dagdegdog, ngurus menta sepeldahna, sarta enggeus sadia, tas jeung paket nu dibungkus, ngagantel 'na sepeldahna.
Gasik clak tumpak bral indit, gura-giru gagancangan, hayang geura tepi bae, ka Sukasari lemburna, ngaderengdeng lampahna, wantu lalakonna jauh, ti setatsiun opat pal.
Lumpat sepeldahna tarik, ngaboseh taya eureunna, munggah kesangna kokoprot, beuki deukeut ka lemburna hatena tingsareblak, ratug asa gok patepung, jeung ibu jeung Nyi Salamah.
Waktuna deukeut ka magrib, panonpoe meh reupreupan, meneran halodo sore, rea jalma tinggulantang, di jalan nu maridang, Ujang Salim geus jrut turun, dina palebah simpangan.
Jalma awewe-lalaki, rajeg pada nararingal, Salim pada malalengcrong, ceuk sawareh putra saha, itu menak ti mana, ceuk sawareh tamu jauh, naha saha nu diseja.
Euweuh nu wawuh sahiji, teu nyangka putra Patimah, wantu pada nyaho kabeh, reh Jang Salim enggeus ajal, najan nu asa-asa, teu nyangka satungtung rambut, yen Jang Salim anu datang.
Ujang Salim acan indit, di jalan masih ngajega, rarat-reret ngulon-ngaler, ningalan jalma nu kenal, tapi kabeh aranggang, ma'lum kaayaan kampung, teu aya anu sonagar.
Nyampeurkeun euweuh nu wani, dupi pernahna ti jalan, ka bumina ibuna teh, kira genep puluh tumbak, ngaliwat lima imah, Salim nyimpang bae tuluy, bari nyered sepeldahna.
Sajeroning leumpang ngincig, hatena teu puguh rasa, tugteg henteu pati jongjon, reujeung pangling titingalan, kampung rea robahna, kira sawatara jauh, memeh datang ka ibuna.
