teu ngeunah sing puguh, ulah teu ngabejaan, malar ibu ngeunah ati, reh salempang ibu teu aya suwungna.
Angot keur mimiti mangkat, ibu gawe teh ngan ceurik, rusras bawaning baluas, melang ti beurang ti peuting, reh euweuh Ujang nyanding, tuman ngariung mungpulung, welas neuleu Salamah, ibu sok remen kaseuit, mun Salamah ka Ujang eukeur sasambat.
Satampana ieu surat, gancang ngawalonan Alim, Sajabana mere beja, samangkatna Ujang indit, ngan mangkuk genep peuting, ibu kawin bae tuluy, anu teu nyana-nyana, rek boga salaki deui, ka Mas Lurah anu bumela ka urang.
Lantaran istrina ajal, teu damangna tilu peuting, ibu kacida hanjakal, malah nepi ka kiwari, ibu teu acan lali, ka Nyi Lurah anu pupus, inget kana belana, malah dina waktu tadi, henteu seja lakian mun teu dipaksa.
Tina inget ka garwana, sakitu nu bela pati, kawuwuh memang geus kadar, tulis ibu nu dipasti, ibu teu bisa mungkir, tina hal ku sabab kitu, supaya Ujang terang, aya berekah Yang Widi, waktu ieu teu susah ku sandang-pangan.
Najan kitu sabalikna, aya dina sugih-mukti, henteu jadi kasenangan, malah tambah wuwuh sedih, sababna nu kahiji, lantaran jeung Ujang jauh, ibu remen kagagas, mun keur dahar-make ginding, ras ka Ujang urut sangsara masakat.
Wungkul ngan ibu sorangan, Ujang mah teu ngimpi-ngimpi, najan eukeur ngeunah dahar, lamun ras ka Ujang eling, rasana euweuh sari, sakapeung sok tara tulus, kadua perkarana, awewe saukur nyanding, beurat beunghar satungtung keur dipisuka.
Lamun geus euweuh jodo mah, balik ka asalna tadi, ku sabab perkara eta, heug bae ku Ujang pikir, sajero Ujang cicing, di Batawi eukeur matuh, kumaha karep Ujang, tapi mun manggih prihatin, henteu betah leuwih hade bae mulang.
Ngan ibu wekas ka Ujang, pepeling ibu sing eling, jalankeun ulah rek salah, malar rahayu nya diri, sapangkat ieu tulis, aya berekah Yang Agung, nuju kasalametan, Mas Lurah Salamah deui,
