Pada maruji naruhun, keur Salamah anu kari, dipak deui ditalian, dibungkus dibuni-buni, ngan nu dicokot duitna, dipesen ka Nyimas Umi.
Ceuk Salim ieu kikintun, baris cawisan pun adi, ku abdi moal dibawa, ditilar di dieu titip, upami ibu geus dongkap, mugi pasrahkeun ku embi.
Sugan pareng aya umur, mun ibu ti Mekah sumping, sarta kapareng kapegat, di Tanjungpriuk ku abdi, tangtu meureun sasarengan, ka dieu rek dongkap deui.
Wangsul Nyimas Umi sukur, ngan mugi salamet diri, pinareng kasalametan, tuang ibu kitu deui, emangna reujeung Salamah, salamet nepi ka balik.
Malahan waktos kapungkur, ibu cacatur ka embi, lamun geus sumping ti Mekah, rek terus hajat sakali, reh tuang rai Salamah, aya nu menta rek ngawin.
Meureun Ujang oge wawuh, kawantu urang Batawi, bejana mah bangsa menak, ngaranna Raden Wiryadi, malahan aya potretna, Ujang meureun geus ningali.
Jang Salim kaget ngaranjug, ngahuleng bari jeung mikir, bungah sajero atina, reh bakal kataksir rapih, reujeung Den Wiryadi masang, Jang Salim pok nanya deui.
Manawi ibu cacatur, naha eta Den Wiryadi, asalna teh urang mana, sareng didamelna deui, ayana di kantor mana, ku abdi rek diilari.
Nyimas Umi pok ngawangsul, eta kurang terang embi, tuang ibu teu bebeja. ngan geus tepung di Batawi, basa rek ngalongok Ujang, sanggeus tuang ibu mulih.
Jol datang surat panyusul, nya eta Den Wiryadi, nanyaan menta Salamah, sarta geus diwalon deui, reh umurna acan cekap, tunggu dua taun deui.
Embi nguping ngan sakitu, tangtu meureun Den Wiryadi, ka tuang ibu bebeja, asal jeung damelna deui, Salim suka campur duka, sukana surup jeung ati.
