Dukana reh acan puguh, jadi atawa teu jadi, wireh kudu nunggu lila, jeung deui hanjakal Salim, ka Wiryadi henteu terang, digawena di Batawi.
Jang Salim deui ngawangsul, rempag teu rempag sim abdi, rempagna memang meujeuhna, teu rempagna dina ati, wirehing teu acan terang, asal turunan Wiryadi.
Ceuk Umi kapan geus puguh, turunan bangsa peryayi, cenah bangsa Raden menak, Jang Salim ngawalon deui, kantenan ari kitu mah, tapi mungguh jisim abdi.
Najan Raden enggeus puguh, abdi henteu pati mambrih, sanajan turunan menak, mun adatna malawading, abdi henteu erek mandang, angot deui di Batawi.
Raden teh meh unggal hulu, asal nu dibendo ginding, kajeun si itu si eta, sanajan ka diri abdi, lamun eukeur gundang-gandang, pada nyebut Raden pasti.
ASMARANDANA.
Sakapeung abdi sok seuri, naek pangkat ngadak-ngadak, meunang titel ngaran Raden, seuri soteh lain bungah, mung ku bubuhan dunya, seueur jalma ngaku-ngaku, darajat nu sanes hakna.
Dibelaan meuli-meuli, disalaksrak diteangan, kajeun rugi ngongkos-ngongkos, jalma kamegahan dunya, kitu watekna alam, tina hayang tambah unggul, dihormat dimulya-mulya.
Padahal henteu dipikir, menggah emutan abdi mah, beurat lamun ngaku Raden, sabab turunan utama, jadi tingkah lakuna, sareng titel kudu surup, alus harkat hade adat.
Menggah pamilih sim abdi, ngan hiji kamanusaan, anu bade dibantu teh, sukur mun aya di menak, tinangtu tambah mulya, laku reujeung ngaran surup, meureun tambah diajenan.
Nyimas Umi teu ngalahir, sumawonna Mas Saca mah, nu aya ngan muji bae, pinterna Salim nyarita, Mas Umi deui nanya, 'na kumaha manah Agus, eta Den Wiryadi tea.
