ngabalesna geus tinangtu, asal bae nu iklas, kaluar ti ati wening, mere maweh ngingetkeun kamanusaan.
Hal perkara duit eta, entong dipulangkeun deui, cekel keur kapereluan, bisi rek dipake deui, kapan Alim rek indit, ka Pandeglang mapay dulur, eta eukeur ongkosna, Jang Salim bungah teh teuing, nganuhunkeun anu teu aya pegatna.
Kacatur bae enggalna, Jang Salim lami ti lami, waktu senang pagawean, ka tuan Jasper geus indit, neruskeun maksud tadi, anu parantos dicatur, nembongkeun potret tea, tuan Jasper geus ningali, henteu salah tetela urut rencangna.
Sanggeus tetela teu salah, gura-giru tuluy balik, sarta ka nyonya bebeja, yen ramana prantos sidik, tuan Jasper ningali, potretna teu samar kalbu, yaktos urut rencangna, ceuk Salim malah ka abdi, maparinan artos dua puluh perak.
Nyonya Berlin pok ngandika, sukur lamun kitu Alim, naha Alim rek iraha, pikarepeun baris indit, Salim ngajawab deui, upami pareng dijurung, hoyong mah enggal-enggal, malar jongjon hate abdi, sasih payun upami taya pambengan.
Saur Nyonya teu halangan, bener kitu pikir Alim, sabab lamun kaelatan, Dolf kaburu ku bijil, ngan tilu bulan deui, samen pangabisan tuluy, bisi kaburu pindah, dibenum ka sejen nagri, kapan Alim geus tangtu bakal dibawa.
Kacatur bae enggalna, kana waktuna geus tepi, baris indit ka Pandeglang, Ujang Salim geus sayagi, piisukeun rek indit, kapegat sinyoh Yus udur, gering ngadadak payah, atuh inditna teu jadi, reh Jang Salim kapaksa kudu ngajaga.
Salim kacida belana, ngajaga beurang jeung peuting, jeung remen diceungceurikan, tina bawaning ku asih, sinyoh Yus kitu deui, Salim henteu meunang jauh, teu aya nu disambat, kajaba ti Ujang Salim, nyonya tuan ka Salim leuwih mujina.
Tina kabelaanana, tuan sok sering badami, jeung nyonya ka Salim ngupat, muji terus lahir-batin, malah di hiji peuting, tuan ka nyonya micatur, saurna teu salempang, lamun jeung Dolf ngahiji, moal melang Salim geus tangtu belana.
