Ngan lamun enggeus papisah, jeung urang leungiteun teuing, 'mo bisa manggih gantina, sanajan sarewu hiji, jalma sarupa Salim, anu bumela tumutur, ngan muga ka hareupna, sing meunang darajat leuwih, malak mandar si Dolf bisaeun ngangkat.
Tuan sinarengan nyonya, ka Dolf sering weweling, mesen kudu pikaheman, angken dulur pet ku hinis, tina belana Salim, malah sok remen dicatur, hal kabelaanna, nulungan ti baya pati, waktu Dolf kalebuh di Pasarikan.
Terus nepi ka ayeuna, bela pati lahir-batin, nyaahna henteu satengah, ka Yus nu keur nandang gering, sabab kitu Jang Salim, ku nyonya tambah diugung, bujeng bae enggalna, sinyoh Yus geus cageur deui, sehat jagjag sakumaha biasana.
DANGDANGGULA.
Kacaturkeun waktu nu dipasti, Ujang Salim mangkat ka Pandeglang, ti Matraman enggeus mios, muru kareta isuk, jam genep ti Mesterkornelis, ganti di Tanah Abang, dupi nu dijugjug, meuli karcis ka Cikeusal, beh kuloneun ti Rangkasbitung saeutik, jalan terus ka Serang.
Ku lantaran masih keneh sepi, sepur anu terus ka Pandeglang, ti Rangkasbitung nu mengkol, harita masih suwung, henteu aya kareta api, Ujang Salim lampahna, terus ngabadudud, naekna kareta langsam, sajajalan Ujang Salim rurak-ririk, nolol tina jandela.
Anu aya heran jero ati, nu katingal sapanjangna jalan, rea bubulak nu plungplong, arang manggihan lembur, sawah-sawah asa teu manggih, saperti di Priangan, nu kaliwat sepur, kenca-katuhu mayakpak, titingalan matak waas kelar resmi, sawah siga lautan.
Kacaturkeun lampah Ujang Salim, perjalananana enggeus datang, ka halteu Cikeusal anjog, Jang Salim barang turun, rurak-ririk bingung saeutik, geusan nanyakeun jalan, ka nu rek dijugjug, wireh acan pisan terang, ti Cikeusal jalan nu terus ka Petir, Salim ngadaweung lila.
