Jang Salim semu mikiran, pijawabeun ka pribumi, menggahing sayaktosna mah, abdi ge mung nembe warti, gaduh dulur di Petir, rupina mah acan wawuh, Jang Salim nyaritana, kandeg kaburu ku sedih, tuluy eureun ngahelas emut ka rama.
Salim teu laju ngomongna, rek nyatur waktuna tadi, katunda rasa baluas, katambah jeung rada isin, pribumi ge ningali, Jang Salim semu ngaheruk, anjeunna ge kagagas, wireh anu dipiwarti, ku Jang Salim jebles lalakon anjeunna.
Pribumi deui ngandika, manis ririh ngalap ati, jadi Asep mun kitu mah, ka dulur nu dipilari, acan pisan papanggih, ka rupana acan wawuh, mama heran kacida, estu matak teu kaharti, seug teruskeun carita tong era-era.
Estu mama hayang terang, wireh asa aneh teuing, Jang Salim terus nyarita, ngalajukeun omong tadi, nyarita beres titi, ti asal waktu kapungkur, asal-usul ramana, sarta dicarita deui, lalakonna manehna waktu ngumbara.
Nepi ka ayeuna pisan, ngabujang di tuan Berling, yen mimiti waktu terang, boga dulur nu di Petir, waktu eukeur badami, nya eta jeung tuan tamu, eta nu ngabejaan, sarta dicarita deui, asal-usul rama waktu didamelna.
Pribumi saregep pisan, ngadangu carita Salim, baluas bawaning welas, milu ngangres sarta sedih, anjeunna ge pribadi, lalakonna siga kitu, emut ka saderekna, nu lolos teu kenging warti, geus puluhan taun henteu pisan tepang.
Pribumi deui ngandika, lalakon Asep kaharti, lamun kitu jalanna mah, estu cara mama badis, mama ge kitu deui, enggeus puluh-puluh taun, leungiteun dulur pisan, diteangan teu kapanggih, nepi kana waktu ieu euweuh beja.
Malah mama geus neangan, ngider-ngider di Batawi, weleh teu bisa kapendak, malah nepi ka kiwari, mama teu weleh eling, tina euweuh deui dulur, estu ngan eta pisan, ngaranna Tubagus Bisri, henteu nyaho hirup atawa geus ajal.
Samalah ninggalkeun anak, ditilar samemeh lahir, direuneuhkeun tujuh bulan, lantaran pegat jeung rabi, itungan ka kiwari,
