nu tebih, ngan semu-semuna wungkul, henteu terang rupana, ari rek indit ningali, moal hade cologog wawanianan.
Ngomong sajero pikirna, abong deudeuleuan aing, sagala anu katingal, ngan wungkul nu dipieling, pedah jeung ibu tebih, asa gokgokan patepung, pangdeuleu oge salah, Salim tungkul jeung ngagisik, kana panon sarta jeung maca istigpar.
Barang ngadaweung geus lila, pribumi ti jero bijil, ma'lum menak pangsiunan, geus sepuh rupina manis, tawis sepuh berbudi, hade semu pinuh elmu, yuswana kira-kira, lima puluh taun leuwih, Ujang Salim cengkat dongko tawis hormat.
Bari ngeser ka nu anggang, korsi ditarik ka sisi, merkoh sila langkung hormat, nembongkeun isin jeung ajrih, pribumi memeh calik, nyaur manis bari imut, Cep ulah anggang-anggang, ka dieu sing deukeut calik, bari lenggah neundeun tampekan 'na meja.
Salim jawab mamanggaan, tetep sila henteu gingsir, pribumi maksa miwarang, tanda someah jeung asih, geus calik ngadeg deui, nyampeurkeun ka Salim muru, metot kana leungeunna, disered miwarang ngalih, Ujang Salim kapaksa mayunan meja.
Diukna adep-adepan, satata pada 'na korsi, pribumi alon mariksa, Asep teh di mana linggih, asa anyar pinanggih, jeung mama kakara tepung, naon anu diseja, Salim walon semu ajrih, kaulanun abdi nyanggakeun duduka.
Margi abdi ngadeuheusan, wireh dina waktos tadi, pang abdi ka dieu dongkap, aya anu diilari, pituduh Jaro tadi, abdi dijurung ngajugjug, ka payuneun gamparan, manawi kapareng hasil, wireh eta anu diilari tea.
Pun dulur anu teu aya, dupi namina teh sami, sinareng putra gamparan, kawit mah ti Sukasari, ngumbara di Batawi, sinareng eta pun dulur, kenging wartos ayana, di dieu matuh di Petir, anu mawi ngilari ka dieu dongkap.
Pribumi deui ngandika, kutan Ujang anu tebih, meureunan kakara pisan, nyaho ka dieu ka Petir, aduh karunya teuing, tangtu teu boga kawawuh, na' kumaha purarana, nu matak Asep ngilari, los ka dieu ka Petir asal-asalna.
