Nu dipilih ku ibuna, nyariosna ka sim abdi, sanes milih bangsa menak, atawa ka jalma mukti, kahayangna mun kenging, hayang ka jalma nu mulus, sae tingkah-lakuna, nu hatena suci wening, nu geus terang bagbagan kamanusaan.
ASMARANDANA.
Den Wiryadi barang nguping, bangun nu bingung mikiran, ngadaweung henteu nyarios, trus deui Salim nyarita, ari kitu tea mah, memang leres kedah kitu, pamilih anu sae mah.
Karepna palay nalungtik, memang henteu jadi lepat, sanajan diri abdi ge, upami geus gaduh anak, tinangtos moal beda, hoyong mendak anu mulus, pimantueun nu utama.
Moal jangji bae kawin, lamun acan terang heula, tingkah-lakuna nu hade, sumawon turunanana, sinareng sabalikna, lalaki ugi nya kitu, teu kenging jangji bojoan.
Tangtos kedah milih-milih, diawaskeun talajakna, lamun jangji bogoh bae, teu jeung pamilih utama, ahirna jadi pisah, kaduhung saprantosna pruk, ahirna jodo teu panjang.
Mugi henteu jadi galih, abdi naros ka gamparan, naha parantos talete, marios turunanana, nu bade dipigarwa asal-usulna kapungkur, ibu sinareng ramana.
Raden Wiryadi ngalahir, parantos ari nanya mah, Encep Tarlan nu nyarios, nyaturkeun ibu-ramana, yen turunan utama, hade ti bapa ti indung, marulus tingkah-lakuna.
Jang Salim pok walon deui, nuhun upami kitu mah, ngan bae hanjakal keneh, wireh eta Encep Tarlan, moal rek nyaho terang, ngan saukur beja batur, margi henteu sasarengan.
Den Wiryadi barang nguping, satengahna kurang senang, reh Ujang Salim talete, manahna raos tugenah, sarta kagungan sangka, pang nanyana nyusul-nyusul, kawas nu rek ngahalangan.
Malar anjeunna teu jadi, kawin reujeung Nyi Salamah, galihna satengah jengkel, malah rada timburuan, nyangka aya niatna, Ujang Salim boga maksud, mikarep ka Nyi Salamah.
